काठमाडौं, कार्तिक २७ । चार दशकभन्दा बढी राजनीति गरेका सांसद अच्युतप्रसाद मैनालीले सदनमा शालीन, बौद्धिक र प्रखरवक्ताको परिचय बनाएका छन् । विसं २०३८ देखि अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)मा संलग्न उनी नेपाल ल क्याम्पस स्ववियु सभापति, नेकपा (एमाले) बारा जिल्ला कमिटी सदस्य, कोल्हवी गाविस उपाध्यक्ष, जिविस सदस्य, एमाले बारा जिल्ला सचिवको जिम्मेवारी सम्हालेको उनीसँग अनुभव छ ।
विसं २०७४ मा तत्कालीन प्रधानमन्त्री केपी शर्मा ओलीको नेतत्वको सरकारको जनसम्पर्क सल्लाहकार भई काम गरेका नेता मैनालीले राजनीतिक परिवर्तनको आन्दोलनमा विभिन्न समयमा करिब दुई वर्ष कारागार जीवन बिताएका छन्। उनी विसं २०७९ को निर्वाचनमा बारा क्षेत्र नं १ बाट सङ्घीय सांसदमा निर्वाचित भएका हुन् ।
नेता मैनालीले वर्तमान कार्यकालका दुई अधिवेशनमा सदनमा भएका अभ्यासबाट आफू सन्तुष्ट हुन नसेको प्रतिक्रिया दिए । उनले भने, ‘जुन सोच र उत्साहका साथ जनताले जसरी मलाई विश्वास गरेर निर्वाचनमा विजयी गराएर सदनमा बढाए, कार्यजिम्मेवारी र परिणामका हिसाबले अपेक्षित भूमिका हुन सकेन । समग्रमा भन्नुपर्दा म त्यति सन्तुष्ट छैन ।’
नेता मैनालीले सडक निर्माण, पूर्वाधार विकास, खानेपानी, विद्युतीकरणका कार्यक्रम वडादेखि पालिका, प्रदेश हुँदै सङ्घसम्मले गर्नुपर्ने जिम्मेवारी तत् तत् संस्था र व्यक्तिले जिम्मेवारी नगरिदिएका कारण सबै विषयको गुनासा र आक्रोश सांसदलाई आएर ठोकिने गरेको घटना सुनाए ।
उनलले भने, ‘मेरो भूमिका भनेको स्थानीय तहदेखि प्रदेश र सङ्घसम्ममा समन्वय गर्ने, समस्याको पहिचान गर्ने र समाधान दिने, जनताका आवाज र विकास निर्माणसम्बन्धी पक्षलाई सम्बोधन गर्ने जिम्मेवारी रहिआएको छ ।’
मुलुकको सङ्कटपूर्ण अर्थतन्त्रका कारण जनताले प्रस्ताव गरेका नयाँ योजना अघि बढाउन चुनौती खडा गरेको जनाउँदै उनले आफ्ना मुख्य प्राथमिकता निजगढ अन्तर्राष्ट्रिय विमानस्थलको निर्माण प्रभारम्भ गर्नु, काठमाडौँ तराई मधेस द्रुतमार्ग निर्माण सम्पन्न गराउन र सिमरौनगढको ऐतिहासिक महत्वको संरक्षण र प्रवद्र्धन गरेको स्पष्ट पारे ।
सांसद मैनालीले भने, ‘जिल्ला र प्रदेशकै प्रतिष्ठा द्रुतमार्ग र निजगढ विमानस्थल समयै निर्माण सम्पन्न हुनुपर्छ, हजारौँ वर्षको इतिहास बोकेको संस्कृति र इतिहासको विराशत बोकेको सिम्रौनगढलाई विश्व सम्पदा सूचीमा पार्न सकियो भने आर्थिक समृद्धिमा ठूलो योगदान दिन सक्छ ।’
कृषिमा आधुनिकीकरण, सिँचाइ, बीउबिजन, माछापालन र अरु सडक पूर्वाधार विस्तारका कार्यक्रमलाई पनि प्राथमिकतामै राख्न पर्ने आवश्यकता रहेको उनको भनाइ छ । स्थानीय तहमा कार्यकारी टिकाउन र बजेट अभाव कारण जनताका आधारभूत आवश्यकतालाई सम्बोधन गर्न नसकिएका विषय पनि सङ्घीय सांसदसँग आएर ठोकिने गरेको जनाउँदै उनले पछिल्लो समय आफूले गरेको घरदैलोमा मतदाताले आफ्ना समस्या कुनै पनि तहका सरकारले गहनरुपमा लिएर सम्बोधन नगरेको गुनासो गरेको जानकारी दिए ।
संसद्को यस कार्यकाल प्रारम्भ भएसँगै गर्नुपरेको उपचुनाव, ससदीय समितिका गठनमा भएको ढिलाइ तथा संसद्लाई प्रभावकारी तुल्याउन सरकारले आवश्यक ध्यान नदिँदा हुन पुगेको अवरोधका कारण सोचेअनुरुप कानुन निर्माणमै आफ्नोसमेत प्रस्तुति कमजोर हुन पुगेको उनले स्पष्ट गरे ।
सदनमा उठेको प्रश्न र भूमिकाबारे प्रतिपक्षका आवाजलाई सम्बोधन गर्न नसकिए पनि सम्मान प्रकट गर्नुपर्नेमा त्यो हुन नसकेको सुन प्रकरणलगायतका घटना सुनाउँदै उनले उठेको महत्वपूर्ण विषयलाई सरकारले रत्तिभर सम्बोधन नगर्ने र बहुमतको दम्भ राख्ने प्रवृत्तिले सदनको ओज र गरिमा कम्जोर भएको आरोप लगाए ।
निर्वाचित प्रतिनिधि नयाँ र संसदीय अभ्यासको अनुभव कमजोर रहेका कारण परिणाम दिने र प्रभावकारी हुनेमा पनि कमजोरी देखिएको बताउँदै नेता मैनालीले सदनलाई परिणाममुखी बनाउन सांसद अभ्यास, प्रशिक्षण र अनुभवको कमी महसुस भएको विचार प्रकट गरे ।
उनले भने, ‘आवेशमा आएर बोल्ने प्रवृत्तिले सिङ्गो सदन र देशको गरिमालाई राम्रो गर्दैन, जिम्मेवार नेता र प्रमुख सचेतकले यस पाटोलाई बुझ्नपर्छ, मिडियाले यसलाई उजागर गर्नुपर्छ भने हामी सच्चिनै पर्छ ।’
नकारात्मक र अराजक गतिविधिले चर्चामा आउने र त्यो नै सर्वोपरि हो भन्ने मानसिकतालाई कदायी स्वीकार गर्न नहुने विचार राख्दै सांसद मैनालीले भने, ‘माननीय’ भनी सम्बोधन गरिसकेपछि आचारविचार र व्यवहार पनि मननीय र माननीय हुन जरुरी छ । यर्थाथ आत्मदेखिनै स्वीकार्य आचरण हुनुपर्छ भन्नेमा म ढुक्क छु ।’
भ्रष्टाचारविरुद्धको नारा दिए पनि हाम्रा व्यवहार र आचार त्यसअनुरुप नभई फरक गरिएको उदाहरणका रुपमा भ्रष्टाचार मौलाउन गएको बताउँदै उनले पछिल्लो समय आत्मसात् गरिएको खर्चिलो निर्वाचन प्रणाली र क्रियाकलापले सादगी राजनीतिलाई ओझेलमा पारेको र राजनीतिक बदनाम भएको प्रतिक्रिया दिए ।
सांसद मैनालीले अभिभावकले बालबालिकालाई र विद्यालयले विद्यार्थीलाई दिइने शिक्षामै जसरी भए पनि पैसा कमाउनुपर्छ भन्ने मनोवृत्तिमा परिर्वन ल्याउन जरुरी भएको बताए । उनले भने, ‘नेपालमा केही पनि छैन, जेछ, विदेशमै छ, पैसा नै सबै कुरा हो, विदेश गएपछि अथाह पैसा कमाइन्छ भन्ने युवा र विद्यार्थीको सोचमा परिर्वतन ल्याउन सक्नुपर्छ । त्यसका लाग देशभित्र अवसर सिर्जना र गुणस्तरीय शिक्षा दिन सक्नुपर्छ ।’ -रासस
