काठमाडौं, मंसिर ८ । नेपालको दुई दिने औपचारिक भ्रमणमा विहिबार अपराह्न काठमाडौँ आइपुगेका कतारका विदेश राज्यमन्त्री सोल्तान बिन साद अल–मुरैखीले आज प्रधानमन्त्री पुष्पकमल दाहाल ‘प्रचण्ड’सँग भेटवार्ता गर्दैछन् ।
उनलाई त्रिभुवन अन्तर्राष्ट्रिय विमानस्थलमा परराष्ट्र सचिव भरतराज पौड्याल तथा नेपालका लागि कतारका राजदूत मिसाल बिन मोहम्मद अलि अल अन्सारी तथा परराष्ट्र मन्त्रालयका उच्च अधिकारीले स्वागत गरेका थिए ।
कतारी अतिथिले आजै परराष्ट्रमन्त्री नारायणप्रसाद साउँदसँग पनि शिष्टाचार भेट गर्ने कार्यक्रम रहेको परराष्ट्र मन्त्रालयले जनाएको छ । विदेश राज्यमन्त्री अल मुरैखी परराष्ट्र सचिव पौड्यालसँग द्विपक्षीय भेटवार्ता गरेर आज नै स्वदेश प्रस्थान गर्नेछन् ।
