काठमाडौं,१२ मंसिर । पोखरामा जारी प्रथम केपी ओली कप टी-२० क्रिकेटमा विभागीय टिम नेपाल पुलिसले सुदूरपश्चिम प्रदेशलाई १५९ रनको लक्ष्य प्रस्तुत गरेको छ ।
टस जितेर सुरुवातमा ब्याटिङ गरेको पुलिसले ओपनर कुशल भूर्तेलको अर्धशतकमा निर्धारित २० ओभरमा मात्र ४ विकेटको क्षतिमा १५८ रन बनायो ।
उसका लागि अर्धशतकीय पारी खेलेका भुर्तेलले ५१ बलमा ५ चौका र ५ छक्काको मद्दतमा सर्वाधिक ६७ रन बनाए । त्यस्तै अर्का ओपनर सुनिल धमलाले ४० बलमा २ छक्का र २ चौकामा ४० रन थप्दा अर्जुन साउदले २० रन बनाए ।
त्यस्तै करण केसीले नटआउट रहँदै ७ रन बनाउँदा दिलिप नाथले अविजित ४ रन बनाए ।
बलिङतर्फ सुदूरपश्चिमका विकास अगारीले २ तथा बसन्त खत्री र भोजराज भट्टले समान १ विकेट लिए ।
पहिलो खेलमा मधेशलाई हराएको पुलिस आजको खेलमा पनि जित निकाल्दै सेमिफाइनलमा पुग्ने लक्ष्यका साथ मैदान उत्रिएको हो भने, सुदूरपश्चि पहिलो जितको खोजीमा हुनेछ । file photo
