काठमाडौं,१८ मंसिर । प्रधानमन्त्री पुष्पकमल दाहाल प्रचण्डले आफू नेतृत्वको सत्ता गठबन्ध परिवर्तन नहुने प्रष्ट पारेका छन् । यूएईमा सम्पन्न भएको कोप २८ सम्मेलन सम्पन्न गरेर आइतबार स्वदेश फर्किएका प्रधानमन्त्री दाहालले सोमबार आफ्नो कार्यकक्षमा आयोजित सम्पादकहरुसँगको भेटघाटमा सो दाबी गरेका हुन् ।
अहिलेको गठबन्धनबारे सम्पादकहरूले राखेको जिज्ञासाबारे जवाफ दिँदै प्रधानमन्त्री प्रचण्डले भने,‘हल्ला भइरहन्छन्, अहिलेको गठबन्धन यताउता हुँदैन।’
प्रधानमन्त्री स्वदेश फर्किएपछि सत्ता परिवर्तन हुने हल्ला चलिरहेको थियो । उक्त हल्लाबारे सम्पादकहरुको जिज्ञासालाई सम्बोधन गर्दै दाहालले केहि असन्तुष्टि भए सबै मिलेर समाधान गर्न तर सत्ता गठबन्धनलाई यताउती हुन नदिने दाबी गरेका हुन् ।
