काठमाडौं । पाँचौँ विश्व मिडिया शिखर सम्मेलन (युनान, चीन) तथा दोस्रो युनान अन्तर्राष्ट्रिय सञ्चार मञ्चले मङ्गलबार दक्षिणपश्चिमी चिनियाँ सहर कुनमिङ (युनान प्रान्त) मा एक समारोह आयोजना गरेको छ ।
उक्त समारोहको उद्घाटन कार्यक्रममा चीनको कम्युनिस्ट पार्टीको युनान प्रान्तीय समितिका सचिव वाङ निङले हालका वर्षमा युनानलाई धेरै अन्तर्राष्ट्रिय सञ्चारमाध्यमहरूले कभर गरेर युनानलाई बाँकी संसारबाट नजिक ल्याएको बताएका छन् ।
युनान प्रान्त विश्वसनीय, आकर्षक र सम्मानजनक चीनलाई बुझ्ने एउटा झ्याल भएको उल्लेख गर्दै उनले शिखर सम्मेलनको फाइदा उठाउन अतिथिहरूलाई यस ठाउँका बारेमा थप आकर्षक कथाहरू पत्ता लगाउन प्रोत्साहित गरे ।
सिन्ह्वा समाचार समितिका प्रधान सम्पादक ल्यु यानसङले चिनियाँ आधुनिकीकरणको प्रगति र दर्शन देखाउनका लागि गहन समाचार कभरेज गरेको र नयाँ युगमा विकास र उपलब्धिहरूको कथा सुनाएको बताए । उनले विश्वव्यापी श्रोता र तिनीहरूको आधुनिकीकरण पहलहरूमा प्रगति गर्दा विश्वभरका मुलुकहरूको व्यावहारिक प्रयासबारेमा जानकारी गराए ।
उनले सहयोगी प्रयासबाट समग्र मानव समाजको आधुनिकीकरणलाई अघि बढाउन विश्वभरका सञ्चारमाध्यमसँगको सहकार्य र समझदारीलाई प्रगाढ बढाउने विश्वास व्यक्त गरे ।
चीनमा संयुक्त राष्ट्रसङ्घका आवासीय संयोजक सिद्धार्थ चटर्जीले भिडियोमार्फत समारोहलाई सम्बोधन गरे । साथै रोसिाय सेगोड्न्या अन्तर्राष्ट्रिय मिडिया समूहका महानिर्देशक दिमित्री किसेलेभ र अन्य अन्तर्राष्ट्रिय अतिथिहरूले पनि समारोहमा आ–आफ्नो भनाइ राखेका थिए ।
उनीहरु सभ्यताहरू बीचको आदानप्रदान र आपसी सिकाइलाई प्रवर्द्धन गर्नाका साथै मानव समाजका लागि आधुनिकीकरणको अनुभूतिमा मिडियाको महत्त्वपूर्ण जिम्मेबारी रहेको कुरामा सहमत भएका छन् ।
उद्घाटन समारोहमा ‘पाँचौँ विश्व मिडिया शिखर सम्मेलनका लागि कुनमिङ पहल’ शीर्षकको दस्तावेज पारित भएको छ ।
शुक्रबारसम्म चल्ने सम्मेलन (युनान, चीन), सिन्ह्वा र प्रान्तीय सरकारको सहआयोजनामा भएको हो । सम्मेलनमा करिब ३० मुलुक र क्षेत्रका मिडिया आउटलेट, अन्तर्राष्ट्रिय संस्था, बुद्धिजीवीसहित करिब ८० संस्थाका तीन सयभन्दा बढी प्रतिनिधिहरू सहभागी छन् । रासस
