काठमाडौं, २१ मंसिर । अमेरिकाबाट नेपाल आएका अमेरिकी कुटनीतिज्ञहरुसँग नेपालका लागि अमेरिकी राजदूत डिन आर. थम्पसनले भेट गरेका छन् । नेपालस्थित् अमेरिकी दूतावासले जनाएअनुसार राजदूत थम्पसनले क्षेत्रीय कार्यशालाहरूमा भाग लिन नेपाल आएका अमेरिकी कूटनीतिज्ञहरूसँग भेट गरेका हुन् ।
यस हप्ताभरि मध्य र दक्षिण एशिया क्षेत्रमा कार्यरत अमेरिकी सरकारका सार्वजनिक मामिला र व्यवस्थापन तर्फका अधिकारीहरू अमेरिका र नेपाललगायत यस क्षेत्रका देशहरू बीचको द्विपक्षीय सम्बन्धलाई अगाडि बढाउन नयाँ प्रविधिहरूको प्रयोग कसरी गर्ने र उत्कृष्ट अभ्यासहरू पहिचान गर्न सहयोग हुने छलफलहरुमा भाग लिने दूतावासले जनाएको छ ।
विश्व अर्थतन्त्र, सांस्कृतिक संरक्षण, र मानसिक स्वास्थ्यमा युवाको संलग्नताको महत्वबारे कुराकानी गर्नुका साथै कूटनीतिज्ञहरूले केही सांस्कृतिक सम्पदा स्थलहरूको भ्रमण पनि गर्ने जनाईएको छ । नेपाल आएका अमेरिकी कुटनीतिज्ञहरुका लागि काठमाडौंमा छुटाउनै नहुने स्थलहरू कुन कुन हुन् त ? भनेर दूतावासले सुझावसमेत मागेको छ।
