काठमाडौं,२२ मंसिर । नेपाली कांग्रेसका नेता डा. शेखर कोइरालाले निर्वाचनमा कम्युनिस्ट दलहरूसँग गठबन्धन गर्दै जाने हो भने कांग्रेस विस्तारै सकिने चेतावनी दिएका छन् ।
शुक्रबार काठमाडौंमा आयोजित एक कार्यक्रमलाई सम्बोधन गर्दै प्रतिनिधि सभा सदस्यसमेत रहेका नेता कोइरालाले चुनावमा गठबन्धन नै गर्ने हो भने लोकतान्त्रिक पार्टीसँग गर्न सकिने बताए ।
‘चुनावमा कम्युनिस्टसँग गठबन्धन गर्दै जान थाल्यौँ भने हामी विस्तारै सकिन्छौँ,’ उनले भने, ‘चुनावमा गठबन्धन गर्ने कि चुनावपछि गठबन्धन गर्ने सोच्नुपर्छ । यदि गठबन्धन नै गर्ने हो भने लोकतान्त्रिक पार्टीसँग गठबन्धन गर्न सकिन्छ’ ।
नेता कोइरालाले मुलुक परिवर्तन गर्ने हो भने कांग्रेस परिवर्तन हुनुपर्ने बताए । ‘देश परिवर्तन गर्ने हो भने कांग्रेस परिवर्तन गर्नुपर्छ,’ उनले भने, ‘कांग्रेस लोकतान्त्रिक पार्टी हो । लोकरिझ्याइमा हामी गइरहेका छौँ । यो सधैँ रहँदैन ।’
तस्विर-मुकुन्द कालिकोटे: रिपोर्टर्स नेपाल डटकम
