काठमाडौं,२९ मंसिर । उच्च अदालत पाटनले सार्वजनिक स्थानमा सुर्तीजन्य पदार्थ बिक्री रोक्ने काठमाडौं महानगरको निर्णय कार्यान्वयन नगर्न अल्पकालीन अन्तरिम आदेश जारी गरेको छ ।
शुक्रबार उच्च अदालत पाटनका न्यायाधीशद्धय जनक पाण्डे र बज्रेस प्याकुरेलको संयुक्त इजलासले यस्तो ओदश जारी गरेको हो ।
‘कानूनबमोजिम सञ्चालन गर्दै आएको उद्योग व्यवसायमा प्रतिकूल असर परी अपुरणीय क्षति पुग्न सक्ने अवस्था देखिएको हुँदा यसमा सुविधा सन्तुलन निवेदकहरूको पक्षमा विचारणीय देखिँदा स्वास्थ्य विभाग, काठमाडौं महानगरपालिकाद्वारा मिति २०८०/०८/१२ मा जारी गरिएको सूचना प्रस्तुत रिट निवेदनको अन्तिम टुंगो नलागेसम्म कार्यान्वयन नगर्नू नगराउनू भनी विपक्षीहरूको नाममा अन्तरिम आदेश जारी गरिदिएको छ,’ उच्च अदालतको आदेशमा भनिएको छ ।
बुधबारदेखि काठमाडौं महानगरपालिकाले काठमाडौं महानगरभित्र सुर्तीजन्य पदार्थ बिक्री गर्न रोक लगाएको थियो । महानगरको निर्णयविरुद्ध श्रीराम टोवागो उद्योग उच्च अदालत पाटन पुगेको थियो ।
