काठमाडौं,४ पुस । संसदको संसदीय सुनुवाइ विशेष समितिको बैठक आज बस्दैछ । बिहान ११ बजे बैठक सिंहदरबारस्थित सभाकक्षमा बस्नेछ ।
आजको बैठकमा सर्वोच्च अदालतको न्यायाधीशका लागि सिफारिसमा परेका ६ जना प्रस्तावित न्यायाधीशको बारेमा निर्णय हुनेछ । न्याय परिषद्ले सर्वोच्च अदालतको न्यायाधीशमा सारंगा सुवेदी, अब्दुल अजिज मुसलमान, महेश शर्मा पौडेल, टेकप्रसाद ढुंगाना, सुनिल पोखरेल र बालकृष्ण ढकालको नाम सिफारिस गरेको थियो ।
उनीहरुमाथि गत शुक्रबारदेखि सुरु भएको सुनुवाइ गत सोमबार सकिएको थियो । सुनुवाइ सकिएकाले आज नाम अनुमोदनका लागि निर्णय हुन लागेको हो ।
समितिले उनीहरूको नाम अनुमोदन गर्ने निर्णय गरेमा राष्ट्रपतिबाट शपथ ग्रहण गरी सर्वोच्च अदालतको न्यायाधीशका रूपमा कामकाज सुरु गर्ने छन् ।
