काठमाडौं,६ पुस । राजधानीमा जारी प्रधानमन्त्री कप महिला राष्ट्रिय टी–२० क्रिकेट प्रतियोगितामा गण्डकी प्रदेशले पहिलो जित हात पारेको छ ।
शुक्रबार भएको खेलमा गण्डकीले कर्णाली प्रदेशलाई ४४ रनले पराजित गरेको हो । जारी प्रतियोगितामा गण्डकीको यो पहिलो जित हो भने कर्णालीको दोस्रो हार ।
मुलपानी क्रिकेट मैदानमा टस जिती पहिले ब्याटिङको निर्णय लिएको गण्डकी प्रदेशले निर्धारित ओभरमा ६ विकेट गुमाएर एक सय ४१ रन बनाएको थियो । जवाफी ब्याटिङमा ओर्लिएको कर्णाली प्रदेशले भने निर्धारित ओभरमा ६ विकेट गुमाएर ९७ रनमात्र बनाउन सक्यो ।
कर्णाली प्रदेशका लागि गौरी बोहराले सर्वाधिक २६ रन बनाइन् । छैटौँ नम्बरमा क्रिज समाल्न आएकी उनले केवल १६ बलको सामना गरी चार चौका हिर्काइन् । ओपनर यमुना थारुले पनि २१ रनको योगदान गरिन् । उनले ४८ बलमा एक चौका पनि हिर्काइन् ।
अर्की ओपनर तृषणा विश्वकर्माले पनि टोलीको खातामा १९ रन थपिन् । उनले २६ बलमा तीन चौका प्रहार गरिन् । कप्तान किरण कुँवर आठ रन बनाउँदै पेभेलियन फर्किइन् । बिना थापा र अञ्जु गुरुङले भने खातासम्म खोल्न सकेनन् ।
बलिङतर्फ गण्डकी प्रदेशकी बलर रचना चौधरीले दुई विकेट लिइन् । ज्यात्सनिका मरासिनी र सुमन खतिवडाले पनि एक–एक विकेट हात पारे ।
त्यसअघि टस जिती पहिले ब्याटिङको निर्णय लिएको गण्डकी प्रदेशका लागि दुई ब्याटरले अर्धसतक बनाएका थिए । ओपरन अञ्जली विश्वकर्माले टोलीका लागि ५१ रनको योगदान गरिन् । उनले ४८ बलमा आठ चौका पनि प्रहार गरिन् ।
ज्योत्सनिका मरासिनीले पनि टोलीका लागि ५० रनको योगदान गरिन् । मरासिनीले ४० बलको सामना गरी एक छक्का र पाँच चौका हिर्काइन् । सुमन खतिवडाले २२ रन बनाइन् । उनले १७ बलमा एक छक्का र दुई चौका प्रहार गरिन् ।
