Logo

जैशीले एकै ओभरमा ३ विकेट चट्काउँदा एपीएफविरुद्ध कर्णालीको शानदार जित



काठमाडौं,१७ माघ । प्रधानमन्त्री कप एकदीवसीय क्रिकेटमा विभागीय टिम एपीएफ क्लबविरुद्ध कर्णाली प्रदेशले शानदार जित निकालेको छ । कर्णालीले दिएको २०७ रनको चुनौती पछ्याएको एपीएफ ४४ ओभरमा १८५ रनमा अलआउट भएपछि कर्णालीले विभागीय टिमविरुद्ध २१ रनको ऐतिहासिक जित निकालेको हो ।

एपीएफका लागि आशिफ शेखले शानदार शतक प्रहार गरे । आशिफले ११२ बलको सामना गर्दै शतक हिर्काएका हुन् । त्यसक्रममा उनाले ९ चौका र २ छक्कासमेत हिर्काएका छन् । आशिफले समग्रमा ११२ बलमा १० चौका र २ छक्काको मद्दतमा १०८ रन जोडेका थिए ।

आशिफले हिर्काएको शतकसँगै यस संस्करणमा १० शतक प्रहार भएको छ । यसअघि आर्मीका विनोद भण्डारीले २ शतक हिर्काउँदा आर्मीकै रासिद खान, कोशीबाट सुजन थपलिया, मधेशबाट अनिल साह र मयन यादव, एपीएफका सन्दीप जोरा, सुदूरपश्चिमबाट नरेन भट्ट र बागमतीका आाशुतोष घिरैयाले शतक प्रहार गरेका छन् ।

आशिफको अतिरिक्त एपीएफका लागि अमर रौटेलाले २८ र कप्तान रोहि पौडेलले १४ रन जोड्नुबाहेक अरुले राम्रो पदर्शन गर्न सकेनन् । एपीएफलाई ऐतिहासिक हार चखाउनेक्रममा कर्णालीका प्रकाश जैशीले शानदार बलिङ गरे । ३ ओभर बलिङ गरेका उनले २ मेड् राख्दै मात्र ९ रन दिएर ४ विकेट चट्काएपछि एपीएफ जित नजिक पुगेरपनि २ अंक गुमाउन बाध्य भयो । जैशीले ४३ ओभरको तेस्रो र चौथो बलमा लगातार चन्दन राम र मौसम ढकाललाई आउट गराउँदा त्यहि ओभरको अन्तिम बलमा रमेश कुर्मीलाई आउट गरेका थिए । त्यस्तै युनिस सिंह र दिपेन्द्र रावतले पनि समान २ विकेट लिए ।

कर्णालीविरुद्धको खेल हारेसँगै एपीएफले ९ खेलबाट १० अंक जोडेर प्रतियोगीता टुंग्याएको छ । एपीएफ अंक तालिकाको पाँचौ स्थानमा झर्दा पुलिस र आर्मीले उपाधिका लागि खेल्ने पक्का भएको छ भने बागमती र मधेश शीर्ष ४ मा रहने निश्चित भएको छ ।

यसअघि त्रिविस्थित कीर्तिपुर मैदानमा टस हारेर सुरुआतमा ब्याटिङ गरेको कर्णाली ४४।१ ओभरमा २०६ रनमा अलआउट भयो । कर्णालीका लागि हिमांशु शाही र अर्जुन घर्तीले अर्धशतकीय पारी खेले । ५० बलको सामना गरेका हिमांशुले ७ छक्का र २ चौका हिर्काउँदै ६२ रनको अर्धशतकीय पारी खेले भने अर्जुनले ७४ बलमा ३ छक्का र १ चौका हिर्काउँदै ५३ रन जोडे ।

अर्जुन र हिमांशुको अतिरिक्त दीपेन्द्र रावत २७, कप्तान रविन्द्र शाही २२, दिनेश अधिकारी १९ र प्रकाश पाण्डे १० रनमा आउट भए । राजेश खड्का, दिवान पुन र अर्जुन चनारा समान १ रनमा रनआउट हुँदा निश्चल रावलले ६ रन थपे ।



प्रतिक्रिया दिनुहोस्

Screenshot