काठमाडौं, माघ २४ । मोरङ क्षेत्र नं ३ बाट निर्वाचित सांसद डा.सुनिल शर्माले दार्चुलाका दुई जना विद्यार्थीलाई निःशुल्क सि.ए (चार्टड एकाउण्टेण्ट) पढाउने भएका छन् । नेपाल विद्यार्थी संघ दार्चुला वहुमुखि क्याम्पस इकाइ समितिद्वारा आयोजित ‘सांसदसंग विद्यार्थी संवाद’ कार्यक्रमका प्रमुख अतिथिसमेत रहेका डा. शर्माले कार्यक्रमलाई सम्बोधन गर्ने क्रममा उक्त घोषणा गरेका हुन् ।
नेपाली काङग्रेसबाट निर्वाचित सांसद शर्माले उक्त घोषणासंगै जागिरको समेत ग्यारेन्टी घोषणा गरेका छन्। क्याम्पसमा अध्ययनरत इच्छुक अब्बल दुई विद्यार्थीहरुलाई काठमाडौं अथवा विराटनगरमा पढ्ने इच्छा भए पढाइको सम्पूर्ण खर्च आफूले बेहोर्ने उनले बताए ।
नोबेल मेडिकल ,काठमाडौं मेडिकल कलेज सञ्चालक समेत रहेका सांसद शर्माले आफू निर्वाचित क्षेत्र तथा क्षेत्रबाहिरका पढाइमा अब्बल कैयौँ विद्यार्थीहरुलाई निशूल्क अध्ययनको व्यवस्था मिलाएका छन् । उनले आफ्नो हस्पिटलमा विपन्न विरामीहरुलाई निशूल्क तथा केहि छुटमा समेत उपचार हुने व्यवस्था समेत मिलाएका छन्।
