काठमाडौं, ४ फागुन । नेपाली कांग्रेसका महामन्त्री विश्वप्रकाश शर्माले विश्वविद्यालयहरुको उपकूलपति नियुक्तिले नागरिकहरुमा नविन आशा जगाउन सक्नुपर्ने बताएका छन् । बिहीबारदेखि सुरु भएको पार्टीको केन्द्रीय समिति बैठकमा पेश भएको महामन्त्री शर्माको राजनीतिक प्रस्तावमा पछिल्लो समय सरकारले गरेका कतिपय नियुक्तिहरु विवादित भइरहेको र अब हुने नियुक्तिहरुले नागरिकलाई नविन आशा जगाउन सक्नुपर्ने उल्लेख छ ।
कतिपय महत्वपूर्ण नियुक्तिहरुमा राजनीतिक भागबण्डा हुँदा सरकारले थप आलोचना सहन परेको उनले उल्लेख गरेका छन् । राजनीतिक नियुक्तिमा व्यक्तिको व्यवसायिक योग्यता,निष्ठा र इमानदारितालाई महत्वपूर्ण रुपमा हेरिनुपर्ने उनले बताएका छन् ।
‘विश्वविद्यालयहरूको उपकूलपति नियुक्तिको प्रक्रियादेखि व्यक्तित्वको छनौटसम्मको विषयमा सरकारले नागरिकमा नविन आशा जगाउने ढंगले नयाँ सन्देश दिन सक्नैपर्छ,’– उनले पेश गरेको राजनीतिक प्रस्तावमा उल्लेख छ ।
साथै, महामन्त्री शर्माले गठबन्धनमा रहेर स्वतन्त्र गतिविधि गर्न कोहीपनि स्वतन्त्र नभएको बताएका छन् । उनले कोशी प्रदेशमा भएको राजनीतिक घट्नालाई लिएर यस्तो टिप्पणी गरेका हुन् ।
प्रतिवेदनमा भनिएको छ–‘कोशी प्रदेशमा पछिल्लो पटक सरकार बनाउँदा र गत राष्ट्रिय सभा चुनावमा माओवादी उम्मेदवार पराजित हुँदा सहयात्री दलले हामीप्रति असन्तोष प्रकट गरेको स्थिति छ, यो घटनाक्रमलाई गम्भीर समीक्षा गर्न, कमजोरी पहिचान गर्न र सहमतिपूर्वक निदान पहिल्याउन जरुरी छ ।’
शर्माले कांग्रेस–माओवादी नेतृत्वको गठबन्धनको सरकार पाँचै वर्ष टिक्छ भनेर दाबी गरिएपनि गठबन्धनमा देखिएको समस्यालाई ढाकछोप गरियो भने गठबन्धनको स्थायित्वमा नै प्रश्न उठ्ने पनि उल्लेख गरेका छन् ।
शर्माले भनेका छन्–‘गठबन्धनको सरकार पाँच वर्ष चल्नुपर्छ भन्ने अपेक्षा, निर्णय र चाहना बोकिरहँदा समस्याको ढाकछोपले होइन खुला छलफल र आपसी विश्वासले मात्र त्यो सम्भव हुने तथ्य भुल्न मिल्दैन, ‘हामीले के हेक्का राख्नैपर्छ भने गठबन्धन छोड्न हामी कुनै पनि दल स्वतन्त्र छौं, तर गठबन्धनमा रहेर स्वतन्त्र गतिविधि गर्न हामी स्वतन्त्र छैनौँ ।’
