काठमाडौं, १७ चैत्र । नेपाल उद्योग वाणिज्य महासंघका अध्यक्ष चन्द्र ढकालले अहिले अर्थतन्त्रमा देखिएको समस्या समाधान हुने विश्वास दिलाएका छन् । रिपोर्टर्स क्लब नेपालको २६औं वार्षिकोत्सव समारोहलाई सम्बोधन गर्दै अध्यक्ष ढकालले यस्तो बताएका हुन् । उनले आर्थिक क्षेत्रमा देखिएको समस्या समाधान गर्नको लागि सरकार र निजी क्षेत्र मिलेर अघि बढ्न्पर्नेमा जोड दिए ।
उनले भने,‘क्लब भन्नेबित्तिकै सञ्चार क्षेत्रमा धेरै नै पपुलर र अभिव्यक्ति आम जनतामा लैजानको लागि क्लबले भूमिका खेलेको छ । चाहे कोभिडको कारणबाट भनौं, रसिया–युक्रेनको युद्धबाट भनौं, अथवा हाम्रा कतिपय नीतिगत कुराहरुको कारणबाट भनौं अहिले ओभरल अर्थतन्त्र समस्यामा छ । संकुचित रुपमा रहेको छ । यसलाई बाहिर ल्याउन सकिन्छ ।’
उनले महासंघले अर्थतन्त्रलाई समस्याबाट बाहिर ल्याउनको लागि प्रयत्न गरिरहेको पनि सुनाए । उनले भने,‘कोभिडपछि पर्यटकहरुको आगमन बढेको छ । रेमिट्यान्स बढेको छ । फरेन करेन्सी रिजर्भ पनि बढेको छ । बैंकको लगानीयोग्य फण्ड पनि छ । आम जनतामा कन्फिडेन्स बढ्न सकेको छैन् । अब त्यो पनि बढाउनुपर्छ । विकास आयोजनाहरुको खर्च भएको कुराको पेमेन्ट पनि पाएको छैन् । यी सबै समस्या समाधान गर्नुपर्छ । छोटो समयमा आम जनतालाई नैराश्यताबाट बाहिर ल्याउन सकिन्छ । सकारात्मक सन्देश लिएर जानुपर्छ । सरकार र निजी क्षेत्रबीच सहकार्य राम्रो छ ।’
