काठमाडौं, १७ चैत्र । राप्रपाका वरिष्ठ नेता डा. प्रकाशचन्द्र लोहनीले रिपोर्टर्स क्लब नेपालले सबै विचारलाई सम्मान गरेको र आफ्नो मञ्च प्रयोग गर्न दिएको भन्दै प्रशंसा गरेका छन् ।
क्लबको २६औं वार्षिकोत्सव समारोहलाई सम्बोधन गर्दै डा. लोहनीले भने–‘ऋषिजीलाई मैले चिनेको दुई दशक भयो । मैले उहाँलाई सधैं सक्रिय र सकारात्मक सोच भएको व्यक्ति पाएँ । उहाँका कार्यक्रममा आउँदाखेरि ऋषिजीले कहिल्यैपनि पक्ष वा विपक्ष गर्नुभएन । भागबण्डा गर्नुभएन । पीडितहरुलाई फोरम दिनुभयो । प्रजातन्त्रमा आफ्नो मनमा लागेको कुरा निर्भिक रुपमा बोल्न पाउनु ठूलो कुरा हो । त्यो फोरम उहाँले उपलब्ध गराउनुभएको हो ।’
लोहनीले पत्रकार धमलाको प्रश्न सोध्ने तरिकाको पनि प्रशंसा गरे । उनले भने,‘उहाँले प्रश्न सोधेर कर्याप्प पार्नुहुन्छ । अरुले आलोचना गर्दा उदार मनले स्विकार गर्नुहुन्छ । प्रश्न सोध्न गाह«ो नमान्ने व्यक्ति हो । मैले उहाँमा ओपननेस र कन्फिडेन्स पाएको छु । लोकतन्त्रलाई सुदृढीकरण गर्न र सार्वजनिक विषयलाई बहसमा ल्याउनको लागि उहाँको भूमिका प्रशंसनीय छ । यो संस्थाले गोल्डेन जुविली मनाउने अवसर पाओस ।’
