![](https://reportersnepal.com/wp-content/uploads/2023/01/aago-768x432.jpg)
बरहथवा (सर्लाही), १० वैशाख । सर्लाहीको दुई स्थानमा लागेको आगोबाट दुई परिवारको विचल्ली भएको छ । आगलागीबाट लाखौँ मूल्य बराबरको क्षति भएको छ ।
जिल्लाको लालबन्दी र बलरा नगरपालिकाअन्तर्गत दुई स्थानमा आगलागी भएको हो । आगलागीबाट दुई घर, एक गोठ र एक सार्वजनिक भवनमा क्षति पुगेको छ । आगलागीबाट दुई परिवारको बास नै गुमेपछि विचल्ली भएको हो । आगलागीमा परेर लालबन्दी नगरपालिका–१४, चुरेस्थित हात्तीसुढेका बुद्धिमान मोक्तान र फुर्साङ मोक्तानको ढुङ्गा, माटो र काठले बनेको घर जलेर नष्ट भएको हो ।
आगलागीबाट बुद्धिमानको घरमा रहेको लत्ताकपडा अन्नपात, काठपात लगायतका सामग्रीसमेत जलेर नष्ट हुँदा आठ लाख बराबरको क्षति भएको प्रहरीले जनाएको छ । आगलागीबाट फुर्साङको पनि घरसहित सम्पूर्ण सामग्री जलेर नष्ट भएको छ । उनको पनि सात लाख बराबरको क्षति भएको जिल्ला प्रहरी कार्यालय सर्लाहीका प्रवक्ता एवं प्रहरी नायब उपरीक्षक दीपक श्रेष्ठले जानकारी दिए ।
आगलागीपछि दुवै परिवार खुला आकाशमुनि पुगेका छन् । सोही आगलागीबाट छिमेकी आइतसिङ मोक्तानको फुसको छाना भएको गोठसमेत जल्दा दुई लाख बराबरको क्षति भएको छ । आगोले पोलेर गोठमा रहेको एउटा भैँसी र एउटा बाख्रा घाइते भएको प्रहरीले जनाएको हो । आगो नजिकैको जङ्गलबाट घरमा सल्किएको प्रहरीले जनाएको छ ।
यस्तै जिल्लाको बलरा नगरपालिकास्थित एक सार्वजनिक भवनमा आगलागी भएको छ । आगलागीबाट बलरा नगरपालिका–६, सानो मिर्जापुरमा रहेको पक्की पर्खाल भएको दलित भवनमा क्षति पुगेको हो । आगलागीबाट भवनमा आंशिक क्षति पुगेको प्रहरी चौकी अर्नाहले जनाएको छ ।
बिजुलीको तार सर्ट भएर लागेको आगोबाट विभिन्न सामान जल्दा १५ हजार पाँच सय मूल्य बराबरको क्षति पुगेको प्रहरीले जनाएको हो । सुक्खा मौसम सुरु भएसँगै जिल्लामा दैनिक आगलागीका घटना वृद्धि भइरहेका छन् । आगोको प्रयोग तथा विद्युतीय उपकरण लगाएका सामानको प्रयोगमा ध्यान दिन प्रहरीले आग्रह गरेको छ । रासस