काठमाडौं, २६ वैशाख । कमलादेवी कैनीले थापाथलीस्थित प्रसूति गृहमा आफ्नो पाठेघरको शल्यक्रियाको क्रममा दुवै पिसाब नली काटिएको बताएकी छन् । आज (बुधबार) रिपोर्टर्स क्लब नेपालमा पत्रकार सम्मेलन गर्दै उनले पाठेघरको शल्यक्रिया गर्ने जिम्मा सिकारु डाक्टरलाई दिँदा उक्त घट्ना भएको बताईन् । उनले घट्नापछि अस्पतालले जिम्मेवारी नलिएको र उल्टै अमानवीय व्यवहार गरेको आरोपसमेत लगाईन् ।
‘सिकारु डाक्टरलाई मेरो अप्रेसन गर्न दिएर दुईवटै किड्नीबाट पिसाब नली छुटाइदिनुभयो । अप्रेसनको दुई दिनपछि मेरो ढाड सुन्नियो । सास फेर्न गाह्रो भएको अवस्था थियो ।’ उनले भनिन्,‘मेरी छोरीले ममीको सास फेर्न समस्या भयो, ढाड सुनिएको छ भनेपछि डा. टुसार जैसीले ग्याँष्ट्रिक भएको छ भन्नुभयो ।’
पाठेघरको अप्रेशन गरेको चार दिनपछि अवस्था एकदमै नाजुक हुँदै जाँदापनि आफूलाई अस्पतालले जबरजस्ती घर पठाएको उनले सुनाईन् । आफूलाई झनै गाह्रो हुँदै गएपछि फेरि अस्पताल गएर सीटीस्क्यान गरेर हेर्दा अप्रेशनको क्रममा दुवै पिसाब नली काटिएको पत्ता लागेको उनले बताईन् । त्यसपछि पाठेघरको भन्दा पनि ठूलो अप्रेसन गर्नुपरेको उनले बताईन् ।
शल्यक्रियापछि झन समस्या बढेको बताउँदा आफ्नी छोरीलाई डा.श्रीप्रसाद अधिकारीले डाक्टरसँग पङ्गा नलिन चेतावनी दिएको उनको आरोप छ । आफ्नो उपचारका क्रममा अस्पतालले लापरवाही गरेको उनको आरोप छ । उनले आफ्नो अप्रेसनपछि आईसीयूमा समेत नराखिदिएको बताईन् । साथै, अप्रेशन गरेको घाउमा कम गुणस्तरको टाँका लगाइदिँदा घाउ पूरै पाकेको उनको भनाइ छ ।
डाक्टरहरुको लापरवाहीले अर्को अप्रेशन गर्नुपरेको भएपनि आफैंले खर्च व्यहोर्नुपरेको उनले गुनासो सुनाईन् । पटक–पटकको अप्रेशन र लापरवाहीले गर्दा अहिले किड्नीमा समेत समस्या देखिएको उनले बताईन् । यस्तो अवस्थामा अस्पतालले कुनै प्रकारको उत्तरदायित्व नलिएको उनको भनाइ छ ।
अब अस्पतालले आफ्नो उपचारमा सहयोग नगरेको खण्डमा मर्नुको विकल्प नरहेको उनले बताईन् । उनले अस्पतालको लाहप्रवाहीको कारण आफूले उचार नगरी मर्नुपर्ने अवस्था आउँदा स्वास्थ्य मन्त्रालयको बाहिर गएर आत्महत्या गर्ने चेतावनी दिईन् ।
‘यतिबेला मलाई भात खान समस्या भइरहेको बेलामा तपाईँको लाहप्रवाहीले गरेर पाँचचोटी काटिएको मेरो घाउलाई शान्त पार्न सिटामोल किन्न नसकेको अवस्थामा मैले अप्रेशन कसरी गर्ने ? मेरो किड्नीको उपचार कसरी गर्ने ? मैले मर्नुपर्छ भने अब स्वास्थ्य मन्त्रालयको बाहिर गएर मर्छु । मेरो केही विकल्प रहेन,’– उनले रुँदै भनिन् ।
