Logo

वार्तामा बसेका आफ्ना नेताहरुलाई कान भरेर गगन थापा संसद्तिर हुईँकिए, ठोस सहमति नभएको निश्कर्ष



काठमाडौं, ६ जेठ । नेपाली कांग्रेसका महामन्त्री गगन थापाले सहकारी ठगी प्रकरणबारे छानबिन गर्नको लागि संसदीय समिति बनाउने सहमति भएपनि कार्यदेश कस्तो हुने भन्ने विषयमा दुवै पक्ष सहमति नभएको टिप्पणी गरेका छन् । सिंहदरबारस्थित् कांग्रेस संसदीय दलको कार्यालयबाट संसद् भवनतर्फ जाने क्रममा मिडियाकर्मीहरुसँगको संक्षिप्त कुराकानीमा थापाले अहिलेसम्म समितिको कार्यदेश के हुने भन्नेबारे ठोस सहमति हुन नसकेको प्रतिक्रिया दिए । उनले छानबिन समिति बनाएपछि व्यक्तिको नामपनि किटान गर्नुपर्ने आफ्नो धारणा छन् ।

सहकारी ठगी प्रकरणको लागि संसदीय छानबिन समिति बनाउन तयार भएका सत्तापक्ष र प्रमुख प्रतिपक्षी दल नेपाली कांग्रेसका नेताहरु छानबिन समितिको क्षेत्राधिकार कस्तो बनाउने भन्नेबारे निश्कर्षमा पुग्न सकेका छन् । आज विहान ११ बजे बस्ने भनिएको प्रतिनिधिसभाको बैठक यही छानबिन समितिको क्षेत्राधिकारमा सहमति जुटाउनको लागि दुवै पक्षका नेताहरु आन्तरिक छलफलमा जुटेपछि दिउँसो २ बजेसम्मको लागि बैठक सारिएको थियो ।

तर, अहिले २ बजेको बैठकपनि निर्धारित समयमा सुरु नहुने देखिएको छ । खासगरी संसदीय छानबिन समितिको क्षेत्राधिकार टुंगो लगाउने जिम्मा पाएको कार्यदल बैठकमा गृहमन्त्री रवि लामिछानेको नाम उल्लेख गर्ने वा नगर्ने भन्ने विषयमा सहमति हुन सकेको छैन् ।

कार्यदलका संयोजक कानूनमन्त्री पदम गिरीको मन्त्रालयस्थित् च्याम्बरमा नै छलफल चलेको छ। २० मिनेटको लागि भनेर निस्किएका कांग्रेस नेताहरु आफ्नो पार्टीका नेताहरुसँगको छलफलपछि पूनः निर्णायक छलफलमा जुटेका छन् । ज्ञानेन्द्र बहादुर कार्की, जिवन परियार र रमेश लेखकले पार्टीका महामन्त्री थापालाई भेटेका हुन् ।

तस्विर : मुकुन्द कालिकोटे, रिपोर्टर्स नेपाल डटकम



प्रतिक्रिया दिनुहोस्