Logo

देशभरका मोबाइल व्यवसायीलाई महाधिवेशनमा सहभागी हुन आह्वान



काठमाडौं, १७ जेठ । नेपाल मोबाइल व्यवसायी महासंघले दोस्रो महाधिवेशन तथा तेस्रो साधारण सभा आयोजना गरेको छ । महासंघले आज (बिहिबार) रिपोर्टर्स क्लब नेपालमा पत्रकार सम्मेलन गरी आगामी जेठ २५ गते काठमाडौंको चाबहिलस्थित स्मार्ट प्यालेस एण्ट इभेण्ट्स प्रा.लि.मा दोस्रो महाधिवेशन तथा तेस्रो साधारण सभा आयोजना गरिएको जानकारी गराएको हो ।

महासंघका महासचिव रमेश घिमिरेले दोस्रो महाधिवेशन तथा तेस्रो साधारण सभाको उद्घाटन सञ्चार तथा सूचना प्रविधिमन्त्री रेखा शर्माबाट हुने बताए । साथै, महाधिवेशनमा नेपालभरबाट करिब एक हजारभन्दा बढी व्यवसायी सहभागी रहने उनको भनाइ छ । महाधिवेशनले अध्यक्षसहित वरिष्ठ उपाध्यक्ष, उपाध्यक्ष ७, महासचिव, सचिव २, कोषाध्यक्ष, सहकोषाध्यक्ष गरी १४ जना पदाधिकारी र वरिष्ठ सदस्य एक जना र ३४ जना केन्द्रीय सदस्य चयन गर्ने उनले बताए ।

देशभर छरिएर रहेका मोबाइल व्यवसायी र सो व्यवसायसँग सम्बन्धित संघ÷संस्थाहरुलाई एकीकृत गरेर व्यवसायलाई सुरक्षित गर्ने उद्देश्यले महासंघ दर्ता भएको महासचिव घिमिरेले बताए । उनका अनुसार अहिले सातै प्रदेशका ७० भन्दा बढी जिल्लाका मोबाइल ब्यवसायीलाई महासंघले संगठित गरिसकेको छ ।

महासंघका केन्द्रीय अध्यक्ष भरत भट्टराईले दोस्रो महाधिवेशन तथा तेस्रो साधारण सभामा सहभागी हुन देशभरका मोबाइल ब्यवसायीहरुलाई आह्वान गरे । उनले मोबाइल व्यवसायमा लगानीपछिको नाफा घट्दो अवस्थामा रहेको बताए । अहिले महँगो रेटका मोबाइल सेट ग्राहकको रोजाइमा परिरहेको भएपनि भन्सार छलीका मोबाइल भित्रिदा ब्यबसायीहरु मारमा परेको उनको भनाइ छ ।

उनले वार्षिक एक अर्ब ८० करोड रुपैयाँ बराबरको मोबाइल सेट नेपालमा विदेश भ्रमणमा जाँदा र आफन्तहरुले विदेशबाट पठाउँदा आइरहेको बताए । त्यस्तै, खुल्ला सीमानबाट राजश्व छली गरेर प्रति महिना पाँच हजार पाँच सयका दरले नेपालमा आइरहेको महासंघको तथ्याङ्क छ । राज्यले भन्सार छलीबाट आउने यस्ता प्रकारका मोबाइल सेटहरुमा प्रतिबन्ध लगाउनुपर्ने महासंघको माग छ ।

यस किसिमका कारोबारको अन्त्य गर्न सरकारले तत्काल एमडीएमएस प्रणाली लागू गर्नुपर्ने उनको भनाइ छ । साथै, सेकेण्ड ह्यान्ड मोबाइलको कारोबारमा सरकारको नीति प्रष्ट हुन आवश्यक रहेको उनले बताए । नीति स्पष्ट नहुँदा व्यवसायीहरु मारमा परेको उनले बताए ।



प्रतिक्रिया दिनुहोस्

Screenshot