काठमाडौं, जेठ २८। त्रिभुवन अन्तर्राष्ट्रिय विमानस्थल आज दिउँसो आधा घण्टाका लागि बन्द हुने भएको छ । त्रिभुवन अन्तर्राष्ट्रिय विमानस्थल नागरिक उड्डयन कार्यालयले आज एक सूचना जारी गर्दै दिउँसो १ बजेदेखि साढे १ बजेसम्म विमानस्थल बन्द गर्न लागिएको जानकारी दिएको हो ।
अपराह्न १ बजे हवाई उडान तथा सुरक्षा र मेडिकल एवं उद्धारसँग सम्बद्ध विभिन्न निकायहरूको सहभागितामा विमानस्थलमा विमान दुर्घटना सम्बन्धी पूर्णकालीन अभ्यास हुने भएकाले आधा घण्टा विमानस्थल बन्द गर्न लागिएको कार्यालयले जनाएको छ ।
यो अभ्यासको मुख्य उद्देश्य सङ्कटको अवस्थामा सहभागी हुने विभिन्न निकायहरू बिच सहयोगको अभिवृद्धि गराउने तथा सहभागी निकायहरूले निर्वाह गर्ने भूमिका तथा जिम्मेवारीको मूल्याङ्कन गरी सम्बद्ध पक्षको क्षमतामा अभिवृद्धि गराइ यस्तो दुर्घटनाको अवस्थामा जनधनको क्षति न्यून गराउने र छिटो भन्दा छिटो विमानस्थलको सुचारु गराउने रहेको प्राधिकरणले जनाएको छ ।
प्राधिकरणका अनुसार अभ्यासको सिलसिलामा विमानस्थल वरिपरिको आकाशमा कालो धुवाँका साथै दमकल, सुरक्षाकर्मी, एम्बुलेन्स तथा अन्य गतिविधिमा तिव्रता आएको पनि देख्न सकिने छ । साथै अभ्यासको आधा घण्टा विमानस्थलमा उडान अवतरण बन्द हुने भएकोले नियमित उडान अवतरण प्रभावित हुन सक्ने प्राधिकरणले जनाएको छ ।
