काठमाडौं, जेठ ३२ । आइसिसि टी–२० विश्वकप अन्तर्गत आज दुई खेल हुँदैछ । आज समूह ‘सी’ अन्तर्गत अफगानिस्तान र पीएनजीबीच हुँदैछ । ट्रीनिडाडस्थित ब्रायन लारा स्टेडियममा हुने यो खेल नेपाली समय अनुसार बिहान ६ः १५ बजेदेखि सुरु हुँदैछ ।
जारी विश्वकपमा अफगानिस्तानले लगातर दुई खेल जितेर ४ अंकसहित समूह ‘सी’ मा दोस्रो स्थानमा रहेको छ । अफगानिस्तानले यो खेल जितेमा सुपर आठमा पुग्ने छ । त्यस्तै पीएनजीले भने लगातार दुई खेलमा हार व्यहोरेको छ ।
त्यस्तै आज दोस्रो खेल अमेरिका र आयरल्याण्डबीच हुँदैछ । फ्लोरिडामा हुने यो खेल नेपाली समय अनुसार राति ८ः १५ बजेदेखि हुँदैछ । समूह ‘ए’ अन्तर्गत अमेरिकाले यो खेल जिते सुपर आठमा आफ्नो स्थान सुनिश्चित गर्नेछ । त्यस्तै आयरल्याण्डले भने यस अघि लगातार दुई खेलमा हार व्यहोरेको छ ।
