काठमाडौं, साउन २१ । श्रीलङ्कामा जारी दोस्रो एकदिवसीय क्रिकेटमा घरेलु टोलीसँग भारत पराजित भएको छ । कोलम्बोमा रहेको आर प्रेमदासा मैदानमा आइतबार भएको खेलमा भारत ३२ रनले पराजित भएको हो । जितसँगै श्रीलङकाले ३ खेलको श्रृङ्खलामा १–० को अग्रता बनाएको छ ।
यसअघि गएको शुक्रवार भएको पहिलो खेल टाइ भएको थियो । हिजोको खेलमा श्रीलङ्काले दिएको २ सय ४१ रनको लक्ष्य पछ्याएको भारतले ४२ ओभर २ बलमा अल आउट हुँदै २ सय ८ रन मात्र बनायो । त्यसअघि टस जितेर पहिले ब्याटिङ रोजेको घरेलु टोली श्रीलङ्काले निर्धारित ५० ओभरमा ९ विकेट गुमाएर २ सय ४० रन बनाएको थियो । भारत र श्रीलङ्काबीचको तेस्रो तथा अन्तिम एकदिवसीय क्रिकेट पर्सि बुधवार हुनेछ ।
