जलेश्वर, २२ भदौ । महोत्तरी जिल्लासहित सम्पूर्ण तराई मधेसमा गएराति उदाउँदो चन्द्रमालाई अर्घ्य दिँदै चौठचन्द्र पर्व (चन्द्रमाको पूजा) सम्पन्न गरिएको छ ।
श्रद्धा र आस्थाको महान् पर्वका रुपमा मानिएको यो पर्व गए राति आकाशमा चन्द्रमा उदाएपछि चन्द्रमालाई विभिन्न वस्तुको अर्घ्य अर्पण गर्दै सम्पन्न भएको हो । यस पर्वलाई मिथिलाञ्चलको गाउँबस्तीमा चौरचन पर्वको नाउँले पनि सम्बोधन गरिन्छ ।
प्रत्येक घरका ज्येष्ठ महिलाले शुक्रबार दिनभरि निलाहार उपवास बसी राति चन्द्रमाको पूजाआजा गरेका हुन् । यस पर्वमा फलफूल, मिठाई, दही, पुरी र खीर खाने चलन रहेको छ ।
यस पर्वका लागि तराई मधेसका सम्पूर्ण घरघरमा केरा, स्याउ, नरिवल, अनार, अम्बा, नासपाती, मकै, निम्बु तथा विभिन्न प्रकारका मिठाई र दही दुईतीन दिनपहिले देखि नै जोहो गरेर राखिएको थियो भने शुक्रबार घरका महिलाले दिनभरि घरघरमा पुरी, खीरलगायत वस्तुहरू पकाएर चन्द्रमा भगवानलाई चढाउँदै पर्व सम्पन्न गरेका छन् ।
चन्द्रमा उदाउनासाथ घरका महिलाले आँगनमा लिपपोत गरेर विभिन्न रङ्गोली बनाएर ल्याएका सबै सामग्री राखेर पूजाआजा गरेका थिए । महिलाले पूजा सकाएपछि घरका सबै सदस्यले पालैपालो आँगनमा राखिएको विभिन्न फल लिएर चन्द्रमालाई ढोग्ने र विभिन्न वर माग्ने गर्दछन् ।
त्यसपछि घरपरिवारका सबै सदस्यले आँगनमै बसेर प्रसाद ग्रहण गर्ने चलन छ । यस पर्वले घरका सबै सदस्यलाई एकै थलोमा जमघट गराउने र एकै साथ खाना खान लगाउने परम्पराले आपसी सम्बन्ध बलियो बनाउने भएकाले यो लोकप्रिय रहेको छ ।
