काठमाडौं, ३ कार्तिक । नेकपा (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ चितवन पुगेका छन् । उनी पार्टीको जनसांस्कृतिक कार्यक्रमलाई सम्बोधन गर्न चितवन पुगेका हुन् । उनीसँगै पार्टीका उपमहासचिव जनार्दन शर्मापनि चितवन पुगेका छन् ।
वेपत्ता योद्धा दण्डपाणी न्यौपाने र अन्य शहीदहरुको सम्मानमा भरतपुर १३ मा आयोजित जनसांस्कृतिक कार्यक्रमलाई प्रचण्डले प्रमुख अतिथिको रुपमा सम्बोधन गर्ने कार्यक्रम छ । उक्त कार्यक्रममा उमहासचिव जनार्दन शर्मा र नेकपाका महासचिव नेत्रविक्रम चन्दलेपनि सम्बोधन गर्ने भएका छन् ।
यसअघि जनार्दनले विप्लवसँग कपिलवस्तुमा पुगेर भेटवार्ता गरेका थिए । पछिल्लो समय जनार्दन र प्रचण्डबीच सम्बन्ध चिसिएको चर्चा थियो । तर, विस्तारै दुई नेताबीच सम्बन्धमा न्यानोपना देखिएका माओवादीका नेता तथा कार्यकर्ताहरुको दाबी छ । प्रचण्डसँगको सल्लाहबमोजिम नै जनार्दनले विप्लवसँग भेटेका हुन् । प्रचण्डले पूर्व माओवादी घटकहरुसँग एकताको लागि जोड दिएका छन् ।
