काठमाडौं, २६ कार्तिक । नेकपा (एमाले) की सचिव तथा पूर्वमन्त्री पद्यमा अर्यालले सहकारी ठगी प्रकरणमा फरार रहेका जिबी राई अनुसन्धानको दायरामा आउने दाबी गरेकी छिन् । उनले भनिन्,‘यो छानबिनको क्रममा उहाँ (जिबी राई) आउनुहुन्छ, नआएर हुँदै हुँदैन नि ।’
नेपाली रेडियो नेटवर्कबाट प्रसारण भएको नेपाली बहस कार्यक्रममा पत्रकार ऋषि धमलासँगको कुराकानीमा उनले जिबी राईलाई नेपाल आएर अनुसन्धानलाई सघाउन आग्रह गरिन् । पत्रकार धमलाले ‘जिबी राई नेपाल आउन चाहनुहुन्छ अरे, तर सरकारले सुरक्षा दिन सक्दैन भनेर कुरा आएको छ नि ?’ भनेर राखेको प्रश्नमा नेतृ अर्यालले सरकारले सुरक्षा दिन नसक्ने भन्ने कुरै नहुने भन्दै खुरुक्क नेपाल आउन भनेकी छिन् ।
अर्यालले थपिन्,‘राज्यले एउटा मान्छेलाई सुरक्षा दिन नसक्ने कुरै हुँदैन्, उहाँहरु बाहिर बसेर फूर्ति लाउने होईन । खुरुक्क आउने, खुरुक्क आएर अनुसन्धानलाई सहयोग गर्ने, अनि जे जे ती पैसा उता उता गरिएको छ, ती पैसा संस्थमा जम्मा गरिदिने, जनतालाई पैसा उपलब्ध गराईदिने र आफ्नो जीवन सहज ढंगले बिताउने हो क्या, भाग्ने होईन ।’ उनले जिबी राईलाई जसरीपनि नेपाल ल्याईने उद्घोष गरिन् ।
