काठमाडौं, १६ मंसिर । नेपाली कांग्रसका प्रभावशाली नेता तथा पूर्वमन्त्री डा. मिनेन्द्र रिजालले पार्टीको १५औं महाधिवेशनमा सभापतिको रेसमा शेखर कोइराला र गगन थापामात्रै नभएर अरु ८ जना नेतापनि रेसमा रहेको बताएका छन् । उनले अहिले सभापतिको उम्मेद्वारको रुपमा शेखर र गगनको नाम चर्चामा हुँदा आफूलाई खुशी नै लागेको प्रतिक्रिया दिए ।
तर, आफूले देख्दा सभापतिको लागि शेखर र गगनबाहेक नै अरु ८ जनाले पनि उम्मेद्वारी दिने उनको भनाई छ । आज (आइतबार) विहान प्राइम टिभीबाट प्रसारण भएको ‘प्राइम सम्वाद’ कार्यक्रममा पत्रकार कृष्ण मल्लसँगको कुराकानीमा पूर्व रक्षामन्त्रीसमेत रहेका नेता रिजालले यस्तो बताएका हुन् ।
उनले भने,‘म यो विषयमा अहिले प्रवेश गर्न चाहन्नँ । तर, मैले देख्दा अरु ८ जना देखिरहेको छु, जो कांग्रेस सभपाति बन्न चाहेका छन् । सबभन्दा खुशीको कुरा, मैले भन्दापनि खुशी नै हुने कुरा हो कि कल्याण गुरुङजीले पनि फेरि सभापतिमै लड्छु भन्नुभएको छ मलाई ।’ उनले अहिले आफूले आउने महाधिवेशनमा उम्मेद्वार बन्नुहोस र मत हाल्छु भनेर शेखर कोइरालालाई नभनेको स्पष्ट पारे ।
