काठमाडौं, २४ मंसिर । नेकपा (माओवादी केन्द्र) का अध्यक्ष पुष्पकमल दाहालकी छोरी गंगा दाहालले भारतीय प्रधानमन्त्री नरेन्द्र मोदीलाई धन्यवाद ज्ञापन गरेकी छिन् । छोरी स्मितालाई विवाहको शुभकामना सन्देश पठाएको भन्दै गंगाले मोदीलाई सामाजिक सञ्जालमार्फत धन्यवाद ज्ञापन गरेकी हुन् ।
मोदीले गंगा दाहालको नाम उल्लेख गरेर भारतीय प्रधानमन्त्रीको लेटरहेडमा पठाएको शुभकामनामा स्मिता र उनका पतिलाई वैवाहिक जीवनको शुभकामना व्यक्त गरेका छन् । आफूलाई विवाह समारोहमा सरिक हुन निमन्त्रणा दिईएकोमा मोदीले धन्यवाद भनेका छन् । साथै, मोदीले प्रचण्डको नामसमेत उल्लेख गरेर शुभकामना दिएका छन् ।
