काठमाडौं, ७ पुष । नेकपा (एमाले) का प्रभावशाली नेता तथा सांसद दयालबहादुर शाहीले एमाले विकासको खोला भैसकेको बताएका छन् । उनले भने,‘चिसो भनेकै कोकाकोला, एमाले भनेको नै विकासको खोला हो ।’
उनले आफ्नो पार्टीका अध्यक्ष केपी शर्मा ओली देश बनाउने भीजन भएको नेता र विकासवादी नेता भएकै कारणले कांग्रेसका सभापति शेरबहादुर देउवाले सरकारको नेतृत्वमा काँध थापेको स्पष्ट पारे । नेता शाहीले माओवादी केन्द्रका अध्यक्ष पुष्पकमल दाहालले अब एमालेको गठबन्धन त परैको कुरा सिन्कोपनि भाँच्न नसक्ने दाबी गरे । उनले भने,‘अब प्रचण्डले एमालेको गठबन्धन त के, उहाँले चाहीँ अब नेपालको राजनीतिमा सिन्कोपनि भाँच्न सक्नुहुन्न ।’
आज (आइतबार) विहान नेपाली रेडियो नेटवर्कबाट प्रसारण भएको नेपाली बहस कार्यक्रममा पत्रकार ऋषि धमलासँगको कुराकानीमा उनले प्रचण्डले कांग्रेस र एमालेको गठबन्धन ढाल्न नसक्ने दाबी गरेका हुन् । सो क्रममा धमलाले ‘प्रचण्डले त जुनसुकै बेला कांग्रेस–एमालेको गठबन्धन ढाल्छु भन्नुभएको छ’ नि भनेर राखेको जिज्ञासामा नेता शाहीले भने–‘उहाँको त ढाल्ने, ढाल्नेमात्रै होईन देशै ढाल्न नोयडामा पहरा बसेर, म लेण्डुप दोर्जे हुन्छु, देश कोल्याप्स गर्छु, मलाई समर्थन देउ भनेर अटल विहारी बाजपेयीदेखि लिएर मनमोहन सिंहको पालासम्म उहाँले दानापानी खानुभयो । अर्काको पैसा खाएपछि उठाउन आउँछन् हेर्नुहोस । किन जयशंकर नेपालको संविधान जारी गर्दा रोक भनेर नेपाल आए त ? किन आउनुभयो भन्दा यी बाबुराम र प्रचण्डले खाएको असुल गर्न आउनुभएको हो ।’
उनले प्रचण्डमाथि देश नै कोल्याप्स गर्न भारत गएको आरोप लगाए । उनले भने,‘हामीले चाहीँ देश कोल्याप्स गर्न गएका प्रचण्डलाई १२ बुँदे समझदारी गरेर यीनलाई इण्डियाको भाँडा माझ्दै गर्दा फर्काएर ल्याएका हौं ।’ उनले नेपालको राजनीतिमा प्रचण्ड ‘कटप्पा’ भएको आरोप लगाए । उनले प्रचण्डले गिरिजाप्रसाद कोइराला, शेरबहादुर देउवादेखि केपी शर्मा ओलीसम्मलाई धोका दिएको आरोप लगाए ।
