काठमाडौं, २० पुष । नेपाली कांग्रेसका प्रभावशाली नेता तथा उपप्रधानमन्त्री प्रकाशमान सिंहले कांग्रेसले आगामी चुनाव एक्लै लडने बताएका छन् । नेपाली कांग्रेस महोत्तरी जिल्ला समितिले बर्दीबासमा आज (शनिबार) आयोजना गरेको कार्यकर्ता भेटघाट कार्यक्रमलाई सम्बोधन गर्दै नेता सिंहले यस्तो बताएका हुन् । उनले त्यसका लागि संगठन निर्माणमा लाग्न आग्रह गरेका छन् ।
केही समयअघि भएको उपनिर्वाचनमा यसको अभ्यास भइसकेको पनि उनले स्मरण गराए । महासमिति बैठकले एक्लै चुनाव लड्ने निर्णय गरेको र केन्द्रीय समिति बैठकले त्यसलाई अनुमोदन गरिसकेको उनको भनाई छ ।
‘आगामी निर्वाचन एक्लै लड्ने भनेर कांग्रेस महासमिति बैठकले निर्णय गरेर केन्द्रीय समितिले अनुमोदन गरिसकेको छ’, सिंहले भने,‘पार्टीको मुख्य शक्ति संगठन हो । त्यसैले हामी सबै संगठन सुदृढीकरण गर्न लाग्नुपर्छ । संगठन निर्माणमा सबैले ध्यान दिउँ ।’
उनले समाजसेवाको सबैभन्दा राम्रो माध्यम राजनीति भएको भन्दै सेवाभावले सक्रिय हुनुपर्नेमा जोड दिए । उनले शहरी विकास मन्त्रालयबाट गर्नुपर्ने काम प्रभावकारी रूपमा अघि बढाइरहेको पनि विश्वास दिलाए ।
