काठमाडौं, २० पुष । नेपाली कांग्रेसका महामन्त्री गगन थापाले प्रधानमन्त्री केपी शर्मा ओलीले दिनदिनै सरकार बदलिँदैन भनेर भाषणा सुरु गर्नुपरेको भन्दै दिक्क मानेका छन् । आज पोखरामा आयोजित पार्टीको अभिमुखीकरण कार्यक्रमलाई सम्बोधन गर्दै उनले सरकारको स्थायित्वको विषयले नेपाली राजनीति गिजोलिएको गुनासो पोखेका हुन् ।
उनले नेपालको सन्दर्भमा गठबन्धनको राजनीति नफापेको पनि टिप्पणी गरे । उनले भने,‘गठबन्धनको यति तीतो अनुभव हामीसँग रह्यो, गठबन्धनको यति विकृत अभ्यास हामीहरुका सन्दर्भमा भयो । चुनाव अगाडिका लागि मात्र होइन, चुनाव पछि पनि हेर्नुस् त यसबीचमा हामीले कतिवटा सरकार बदल्यौं, सरकारमा बसेको प्रधानमन्त्रीले हरेक दश दिनमा यो सरकार बदलिन्न भन्नुपर्ने अवस्था छ । भाषण यो सरकार बदलिन्न भन्नेबाट सुरु हुन्छ ।’
