काठमाडौं, २० पुष । सर्वोच्च अदालत बार एशोसिएसनको अध्यक्षमा कांग्रेसनिकट वरिष्ठ अधिवक्ता मेघराज पोख्रेल भारी मतले निर्वाचित भएका छन्। पोख्रेल ३ सय ६८ मत ल्याएर विजयी हुँदा उनका निकटतम प्रतिद्वन्द्वी महेशकुमार थापाले १ सय ८१ मत ल्याएका छन्। यस्तै, अध्यक्षका अर्का उम्मेदवार प्रेमसिंह धामीले जम्मा १५ मत ल्याए ।
अध्यक्षमा निर्वाचित वरिष्ठ अधिवक्ता पोख्रेल कांग्रेसनिकट डेमोक्रेटिक लयर्स एसोसिएसन (डिएलए) र नेकपा (एकीकृत समाजवादी) निकट प्रगतिशील कानुन व्यवसायी संगठन (एसपिएलए) को प्यालनबाट अध्यक्षको उम्मेदवार बनेका थिए। पोख्रेलसँग पराजित थापा भने एमालेनिकट पेसागत कानुन व्यवसायी संगठन (पीपीएलए) र माओवादीनिकट क्रान्तिकारी कानुन व्यवसायी संगठन (आरपीएलए) को संयुक्त प्यानलबाट अध्यक्षको उम्मेदवार बनेका थिए ।
यस्तै, उपाध्यक्षमा पोख्रेल प्यानलबाट एसपीएलएका अम्बरबहादुर राउत विजयी भएका छन्। राउतले ३ सय ४६ मत ल्याउदा निकटतम प्रतिद्वन्द्वी पीपीएलएका भिष्मराज कडरियाले १ सय ७३ मत ल्याए।
सचिवमा रमणकुमार कर्ण विजयी भए। उनले ३ सय ३९ मत ल्याएका छन्। उनीपनि पोख्रेलकै प्यानलबाट उम्मेद्वार थिए । महिला सह-सचिव पनि पोख्रेल प्यानलकै पुन्देवी महर्जन (सुजना) र कोषाध्यक्षमा डिएलएका रामचन्द्र पौडेल विजयी भएका छन्। सहसचिवमा महर्जनले ३ सय ३७ र कोषाध्यक्षमा पौडेल ३ सय ४३ मत ल्याएर विजयी भएका हुन्।
महिला सदस्यमा पोख्रेलको प्यानलकै शशि बस्नेत निर्वाचित भएकी छिन्। उनले ३ सय १७ मत ल्याएर विजयी भएकी हुन्। सदस्यमा पोख्रेलको प्यानलबाट दुर्गामोहन श्रेष्ठ, इन्द्रशेखर खड्का, प्रदीपकुमार श्रेष्ठ, नागेश्वरप्रसाद चौधरी, निर्मलप्रसाद उपाध्याय, ओमकृष्ण श्रेष्ठ, प्रमोद रेग्मी र प्रदिपकुमार राजवंशी निर्वाचित भएका छन्।
अर्का एक सदस्यमा भने थापा प्यानलका सतिशराज मैनालीले जित निकालेका छन् । उनी माओवादी केन्द्रनिकट कानून व्यवसायी हुन् ।
