वासिङ्टन, ८ माघ । अमेरिकी राष्ट्रपति डोनाल्ड ट्रम्पले सोमबार आफ्नो शपथग्रहणअघि युद्धविरामका लागि गरिएको कूटनीतिको प्रशंसा गर्दै गाजामा युद्धविराम सम्झौता हुने कुरामा आफू विश्वस्त नभएको बताएका छन् ।
“म विश्वस्त छैन”, ह्वाइट हाउस फर्किँदा एक पत्रकारले दुवै पक्षले युद्धविराम कायम राख्ने र सम्झौतामा अघि बढ्ने बारे सोध्दा उनले भने, “यो हाम्रो युद्ध होइनस यो उनीहरूको युद्ध हो । तर म विश्वस्त छैन ।”
तथापि ट्रम्पले सन् २०२३ अक्टोबर ७ मा इजरायलमा भएको अभूतपूर्व आक्रमणबाट सुरु भएको युद्धमा हमास ‘कमजोर’ भएको विश्वास गरेको बताए । “मैले गाजाको एउटा तस्विर हेरेँ”, उनले भने, “गाजा एक विशाल विध्वंस स्थल जस्तै छ ।”
सम्पत्ति व्यवसायीबाट लोकप्रिय राजनीतिज्ञ बनेका ट्रम्पले योजना अघि बढेमा गाजाले एक ‘अद्भुत’ पुनर्निर्माण देख्नसक्ने बताए ।
“यो समुद्र किनारमा रहेको एक अद्भुत स्थान हो – उत्कृष्ट मौसम । तपाईंलाई थाहा छ, सबै कुरा राम्रो छ । यो जस्तो, केही सुन्दर कुराहरू त्यहाँ गर्न सकिन्छ”, उनले भने।
इजरायल र हमासले आइतबार बन्दी र कैदीहरूको आदान–प्रदान समावेश भएको युद्धविराम सम्झौता कार्यान्वयन गर्न थालेका छन् ।
यो योजना सुरुमा तत्कालीन राष्ट्रपति जो बाइडेनले मे महिनामा प्रस्तुत गरेको थियो र बाइडेन तथा ट्रम्पका दूतहरूको असामान्य संयुक्त कूटनीति पछि यसलाई अघि बढाइएको थियो ।
सम्झौताका लागि दबाब दिँदै ट्रम्पले इजरायललाई दृढतापूर्वक समर्थन गर्ने पनि स्पष्ट पारेका छन्।
आफ्नो पहिलो कार्यहरू मध्ये एकमा उनले प्यालेस्टिनीहरू विरुद्धको आक्रमणलाई लिएर बाइडेन प्रशासनले वेस्ट ब्याङ्कमा कट्टरपन्थी इजरायली बसोबास गर्नेहरूमाथि लगाएको प्रतिबन्धहरू खारेज गरे । रासस
