काठमाडौं, ८ माघ । नेकपा (माओवादी केन्द्र) का अध्यक्ष पुष्पकमल दाहालले अहिलेको कांग्रेस र एमालेको सरकार धेरै लामो नजाने दाबी गरेका छन् । चितवनको भरतपुर विमानस्थलमा सञ्चारकर्मीहरुसँगको संक्षिप्त कुराकानीमा उनले यस्तो बताएका हुन् ।
प्रचण्डले प्रधानमन्त्री केपी शर्मा ओली नेतृत्वको सरकार धेरै नजाने घोषणा गर्दा कांग्रेसका प्रभावशाली नेताहरु डा. शशांक कोइराला र डा. चन्द्र भण्डारी सँगै थिए । प्रचण्डले भने-“तर, यो सरकार धेरै लामो जान्छ भन्ने हामीलाई लाग्दैन् । यो कुरापनि मैले बडो प्रष्ट भन्ने गरेको छु । स्वभाविक छैन् । पारदर्शी छैन् । यसले गरेका कामपनि उल्टा उल्टा हुँदै गएका छन् । अहिले अध्यादेशसम्म आउँदा त लाजैमर्दो भएको छ ।”
साथमै रहेका कांग्रेस नेता शशांकले आफूहरुले एमालेसँग मिलेर राजनीतिक स्थायित्व दिन सकिन्छ कि भनेर सहकार्य गरेको सुनाए । तर, राजनीतिमा जेपनि सम्भव रहेको भन्दै प्रचण्डले सरकार लामो नजाने भनेर दिएको स्टेटमेण्टमा मौन सहमति जनाए । साथमा रहेका अर्का नेता चन्द्र भण्डारीले भने कुनै प्रतिक्रिया दिएनन् ।
