काठमाडौं, माघ १४ । कांग्रेस संसदीय दलको बैठक आज पनि बस्दै छ । संघीय संसदको हिउँदे अधिवेसनको तयारीका लागि हिजो दिउँसो सुरु भएको बैठक आज पनि बस्न लागेको हो ।
आज दिउँसो १ बजे संघीय संसद भवन नयाँ बानेश्वरमा बस्ने बैठकमा संसद्को हिउँदे अधिवेशनबारे छलफल, सरकारले जारी गरेको अध्यादेश बारे एकीकृत धारणा बनाउने लगायतका बिषयमा छलफल हुनेछ ।
आजको बैठकमा कांग्रेसबाट सरकारमा सहभागी भएका मन्त्रीहरुको काम र प्रभावकारिताबारे सांसदले आफ्ना धारणा राख्नेछन् । त्यसपछि मन्त्रीहरुले यो अवधिमा गरेका आफ्ना कार्य र सांसदका जिज्ञासामा जवाफ दिने कांग्रेसले जनाएको छ ।
आगामी १८ माघबाट संघीय संसद्को अधिवेशन सुरु हुँदैछ । गत पुस २६ गते बसेको मन्त्रीपरिषदको सिफारिसमा राष्ट्रपति रामचन्द्र पौडेलले दुबै सदनका अधिवेशन आह्वान गरिसकेका छन् ।
