काठमाडौं, १८ माघ । प्रधानमन्त्री केपी शर्मा ओलीले आफ्नो सरकारको मेन्युमा पार्टी टुक्र्याउने वा भत्काउनेजस्ता खुद्रे कुराहरु समावेश नभएको स्पष्ट पारेका छन् ।
सरकारले दल विभाजनसम्बन्धी अध्यादेश ल्याउन लागेको हल्ला चलेको बेलमा प्रधानमन्त्री ओलीले प्रतिनिधिसभाको आजको बैठकमा सम्बोधन गर्दै आफ्नो सरकारको मेन्युमा दल विभाजन गर्ने कुरा नभएको स्पष्ट पारेका हुन् ।
उनले भने,‘ढुक्क हुनुहोस, कांग्रेस र एमालेसहितको यति बलियो सरकारको प्राथमिकता त्यस्तो हुन सक्दैन् । सरकारका प्राथमिकताकाबारेमा मैले भनिसकेको छु । दोहोर्याउनु पर्दैन् ।’ विपक्षमा रहेका नेताहरुले पनि सरकार ढल्छ, ढल्नै लाग्यो भनेर व्यर्थै समय खेर फालेको उनको टिप्पणी छ ।
