संखुवासभा, असोज ८ । कोशी राजमार्ग अन्तरगत संखुवासभाको खाँदबारी–तुम्लिङटार सडक खण्डमा दुई वटा सवारी साधन भ्यान एक आपसमा ठोक्किदाँ ११ जना घाइते भएका छन् ।
कोशी राजमार्ग अन्तरर्गत खाँदबारी–तुम्लिङटार सडक खण्डमा दुई वटा भ्यान एक आपसमा ठोक्किंदा ११ जना घाइते भएको जिल्ला प्रहरी कार्यालय संखुवासभाका प्रहरी निरीक्षक रामकुमार लामिछानेले जानकारी दिनुभयो ।
सोमबार खाँदबारीदेखि तुम्लिङटार जाँदै गरेको को १ ज २३०३ नम्बरको भ्यान र तुम्लिङटारबाट खाँदबारीतर्फ आउँदै गरेको बा.प्र.०१–०३० च ५७८२ नम्बरको विद्युतीय भ्यान एक आपसमा ठोक्किएर दुर्घटना भएको प्रहरीले जनाएको छ । घाइतेको जिल्ला अस्पताल संखुवासभामा उपचार भइरहेको प्रहरीले जनाएको छ ।
दुर्घटनामा को १ ज २३०३ नम्बरको मारुती चालक भ्यान भोजपुरको षडानन्द नगरपालिका –८ का २९ बर्षीय रितेश श्रेष्ठ, षडानन्द नगपालिका–१२ का २८ बर्षीया मिना तामाङ, ४७ बर्षीय राम बहादुर विश्वकर्मा, ४६ बर्षीया हिरामाया विश्वकर्मा,२८ बर्षीय मोहन तामाङ, षडानन्द –१० का ५० बर्षीय राज कुमार राई भएका छन् ।
त्यसैगरी षडानन्द –२ कुदकाउलेका ७० बर्षीय मचिन्द्र विष्ट, संखुवासभाको खाँदबारी नगरपालिका– ३ मानेभञ्याङकी ६८ बर्षीय शान्ति घिमिरे घाइते भएको जिल्ला प्रहरी कार्यालयका प्रहरी निरीक्षक लामिछानेले बताए ।
त्यस्तैगरी विद्युतीय भ्यान बा.प्र.०१–०३० च ५७८२ नम्बरमा सवार संखुवासभाको सभापोखरी गाउँपालिका –२ की २८ बर्षीया उर्मिला खनाल र उनका छोरा ५ बर्षीय उशल खनाल घाइते भएका छन् । घाइते मध्ये केही यात्रु गम्भीर घाइते भएका छन् ।
प्रहरीले विद्युतीय भ्यान चालक मकालु गाउँपालिका-७ का ४५ बर्षीय लाक्पा गुरुङलाई नियन्त्रणमा लिएको छ । घटनाको बारेमा थप अनुसान्धान भइरहेको जिल्ला प्रहरी कार्यालयले जनाएको छ ।
