काठमाडौं, २१ मंसिर । परराष्ट्रमन्त्री डा. आरजु राणा गायिका स्मिता दाहालको विवाह समारोहमा सहभागी भएकी छिन् काठमाडौंको गोकर्णस्थित नर्लिङ रिसोर्टमा स्मिताले प्रेमी सायुज्य श्रेष्ठसँग विवाह गरेकी हुन् ।
सो विवाह समारोहमा स्मिताका हजुरबुवा नेकपा (माओवादी केन्द्र) का अध्यक्ष पुष्पकमल दाहाल सुरुदेखि नै उपस्थित् छन् । विवाह समारोहमा पुगेकी आरजुले प्रचण्डसँग चिया पिउँदै गफ गरेकी हुन् । उनीहरुबीच सौहार्दपूर्ण रुपमा भलाकुसारी भएको तस्विरमा देखिन्छ ।
कांग्रेस र एमाले मिलेर सरकार बनाएपछि प्रचण्ड सत्ताबाट बाहिर छन् । यो बीचमा उनले कांग्रेस र एमाले नेतृत्वको गठबन्धनविरुद्ध कडा अभिव्यक्ति दिँदै आएका छन् । तर, उनको आक्रोश कांग्रेसभन्दा पनि एमाले नेतृत्वप्रति बढि छ । प्रधानमन्त्री केपी शर्मा ओली हिजोमात्रै चार दिने चीन भ्रमण सकेर स्वदेश फर्किएका छन् ।
भ्रमणको दौरान अन्तिम समयमा बीआरआई फ्रेमवर्कमा सम्झौता भएको छ । जसलाई लिएर कांग्रेस र एमालेबीच मनमुटाव सुरु भएको चर्चा छ । यही चर्चाबीच मन्त्री राणा आज प्रचण्डको नातिनीको विवाह समारोहमा पुगेकी हुन् । यसलाई कतिपयले अर्थपूर्ण रुपमा हेरेका छन् ।
