काठमाडौं, २२ मंसिर । नेपाल पत्रकार महासंघको आसन्न निर्वाचनमा अध्यक्षका उम्मेद्वार रमेश विष्टले आफ्नो नेतृत्वको प्यानल सार्वजनिक गरेका छन् । विष्ट नेतृत्वको प्यानललाई ६ पत्रकार संगठन र स्वतन्त्र पत्रकारहरुको समर्थन रहेको जनाईएको छ । यस प्यानलको नाम श्रमजीवी पत्रकारहरुको साझा प्यानल नाम दिईएको छ ।
आज (शनिबार) रिपोर्टर्स क्लब नेपालमा पत्रकार सम्मेलनको आयोजना गरी विष्ट नेतृत्वको प्यानल सार्वजनिक गरिएको हो । यसअघि अध्यक्षमा उम्मेद्वारी दिएका नेकपा (माओवादी केन्द्र) निकट प्रेस सेन्टरका कलम गिरीले आफ्नो उम्मेद्वारी फिर्ता लिएर विष्टलाई सघाएका छन् विष्टलाई माओवादीनिकट प्रेस सेन्टर, नेकपा (एकीकृत समाजवादी) निकट समाजवादी प्रेस संगठनसलगायत साना संगठनहरुले समर्थन छ ।
विष्टको प्यानललाई श्रमजिवी पत्रकारहरुको साझा प्यानल नाम दिइएको छ । सो प्यानलबाट वरिष्ठ उपाध्यक्षमा माओवादीनिकट प्रेस सेन्टरबाट हालका महासचिव रोशन पुरीले उम्मेदवारी दिएका छन् । यस्तै, महिला उपाध्यक्षमा गंगा पौडेल (बराल), समावेशी उपाध्यक्षमा सुभास प्रसाद साह र महासचिवमा लेखनाथ न्यौपानेको उम्मेद्वारी छ । यस्तै, खुला सचिवमा उत्तरसिंह विष्ट समेटिएका छन् ।
मधेशी सचिवमा श्रीजन झा, महिला सचिवमा सरिता बराइली, दलित सचिवमा वसन्त विक, आदिवासी जनजाति सचिवमा भिषण राई, एशोसियट सचिवमा विकास कार्की र कोषाध्यक्षमा रामकृष्ण अधिकारी समेटिएका छन् । यस्तै विष्टको प्यालनबाट लेखा संयोजकमा ध्रुव रावल समेटिएका छन् ।
विष्टको प्यालनबाट केन्द्रीय सदस्यहरुको नामसमेत सार्वजनिक गरिएको छ । जसमा कोशी प्रदेश केन्द्रीइ सदस्यहरुमा तीर्थ सिग्देल र दिपेन्द्र कुमार राई समेटिएका छन् । मधेश प्रदेश केन्द्रीय सदस्यहरुमा राजु विश्वकर्मा र संजय कुमार राउत छन् । यस्तै, बाग्मती प्रदेश केन्द्रीय सदस्यमा उपत्यकाबाहेकमा मणिराज गौतम र मिनकुमार दाहाल छन् । गण्डकी प्रदेश केन्द्रीय सदस्यमा दिपक भट्टराई छन् । लुम्बिनी प्रदेश केन्द्रीय सदस्यमा यानेन्द्र जिसि र सुमन अधिकारीको नाम समावेश छ । कर्णाली प्रदेश केन्द्रीय सदस्यहरुमा देविराम देवकोटा र यज्ञराज थापा छन् । यस्तै, यो प्यानलबाट सुदूरपश्चिम प्रदेश केन्द्रीय सदस्यहरुमा डिलबहादुर सिंह र रामसिंह ठगुन्ना समेटिएका छन् ।
यस प्यानलबाट लेखा समिति सदस्यमा गणेश प्रसाद बञ्जाडे (पुरुष) र लक्ष्मी चौधरी (महिला) छन् । उपत्यका प्रदेश केन्द्रीय सदस्यमा अर्जुन पन्त र सूर्य सुवेदी समेटिएका छन् । प्रतिष्ठान प्रदेश केन्द्रीय सदस्यहरुमा वीरेन्द्र ओली र साहास भट्ट छन् । खुला केन्द्रीय सदस्यहरुमा केशव बहादुर भुल, दामोदर खनाल, लेखनाथ खतिवडा, बुद्ध लोप्चन र रामकुमार श्रेष्ठ समेटिएका छन् । महिलाबाट रिता बुढाथोकी (दलित) मा निर्विरोध भएकी छिन् ।
आदिवासी, जजजातिमा सरु राना, मधेशीबाट मिनकुमारी यादव, खस–आर्य दिया चन्द छन् । दलित केन्द्रीय सदस्यमा लक्ष्मण दर्नाल (पुरुष) रहेका छन् । आदिवासी जनजातितर्फ अर्जुनबहादुर तामाङ (पुरुष) र महिलातर्फ निर्विरोध भएको जनाईएको छ । मधेशीतर्फ चन्द्रदेव कामती (पुरुष) र ललिताकुमारी साह (महिला) समेटिएका छन् । यस्तै, अपांगतातर्फ केन्द्रीय सदस्यमा अर्जुन काफ्ले र अल्पसंख्यक तर्फ केन्द्रीय सदस्यमा बख्तियार अली छन् ।
अध्यक्ष पदका उम्मेदवार विष्टले आफ्नो टिम इमानदार र अनुभवी रहेको बताए । उनले आफूहरु निर्वाचित भएपछिको महासंघको इमानदारिताको कसीमा प्रश्न चिन्ह खडा हुन नदिने प्रतिवद्धता व्यक्त गरे । महासंघको गौरवपूर्ण इतिहास र आगामी दिनमा लोकतन्त्रमाथि आउने चुनौति, मानवअधिकारको क्षेत्रमा आउने चुनौति, प्रेस जगत र अभिव्यक्ति स्वतन्त्रतामा आउने चुनौतिको सामना गरेर अगाडि बढ्न आफू नेतृत्वको टिमलाई विजयी गराउन पनि उनले आग्रह गरे ।
‘नेपालको लोकतन्त्र, नागरिक अधिकार, मानव अधिकार, अभिव्यक्ति स्वतन्त्रता, प्रेस स्वतन्त्रताजस्ता लोकतन्त्रका गहनाहरुलाई आत्मसात् गर्दै, रक्षा गर्दै र त्यसलाई प्रवद्र्धन गर्दै आजको दिनसम्म एउटा विशाल स्वरुप ग्रहण गरेको पत्रकार महासंघको नेतृत्व गर्ने र त्यो नेतृत्वले गर्ने प्राथामिकताका कार्यसूचीहरु के हुन् ? त्यसले गर्नुपर्ने कामहरु के हो ? र विगतमा हामीले प्राप्त गरेका विराशतहरु के हुन् ? नेपालको मिडियाको चुनौति, नेपालको अभिव्यक्ति स्वतन्त्रताको चुनौति, प्रेस स्वतन्त्रताको चुनौति र मानव अधिकारमा आउने चुनौतिहरुलाई कसरी भन्ने स्पष्ट दृष्टिकोणका साथ यो टिम चुनावी मैदानमा आएको छ । यो टिम इमानदार र अनुभवी छ । यो टिमको विजयपछि इमानदारिताको कसीमा प्रश्न चिन्ह खडा हुने अवस्था हामी सिर्जना हुन दिँदैनौं,’– उनले भने ।
यस्ता छन् रमेश विष्ट प्यानलका उम्मेदवारहरूको प्रतिबद्धता
१) सर्वप्रथम हामी प्रेस तथा अभिव्यक्ति स्वतन्त्रता, सूचनाको हक र लोकतन्त्रको पक्षमा नेपाल पत्रकार महासंघले गर्दै आएको सम्झौताहिन संघर्षप्रति गौरव गर्दै यसक्रममा आफ्नो जीवन बलिदान गर्नुहुने योद्धाहरुप्रति उच्च सम्मानसहित भावपूर्ण श्रद्धान्जली व्यक्त गर्दछौं । साथै यसका लागि कष्टसाध्य संघर्ष गर्नुहुने हाम्रा सम्पूर्ण अग्रजसहित प्रेस स्वतन्त्रता सेनानीहरुप्रति अभिनन्दन प्रकट गर्दछौं । हामी उहाँहरुले निर्माण गरेको गौरवपूर्ण इतिहासलाई कायम राख्दै सोही बाटोमा अनबरत हिडिरहने प्रण गर्दछौं।
२) नेपाली पत्रकारितालाई स्वच्छ, मर्यादित र उत्तरदायी बनाउनका लागि महासंघभित्र र पत्रकारिता क्षेत्रमै शुद्धीकरणको आवश्यकता छ । यसका लागि नेपाल पत्रकार महासंघलाई क्रियाशील पत्रकारहरुको मात्रै साझा संगठन बनाई आम धमजीवी पत्रकारको साझा नेतृत्वदायी पेशागत संगठनका रूपमा अघि बढाउनेछौं साथै लोकतान्त्रिक समूदायको भरोषायोग्य नागरिक संस्थाको रुपमा स्थापित महासंघको गरिमा, गौरव र सामाजिक स्वीकारोक्तिलाई वृद्धि गर्न प्रतिवद्ध छौं ।
३) हाम्रो प्यानल श्रमजीवी पत्रकारहरुको हकहित र अधिकारप्रति पूर्ण प्रतिवद्ध छ । हामी श्रमजीवी पत्रकार सम्बन्धी ऐनको पूर्ण कार्यान्वयनका निम्ति ठोस पहल गर्ने प्रतिवद्धता व्यक्त गर्दछौं । श्रमजीवी पत्रकारका लागि औषधोपचार, तालिम, पुरस्कार, फेलोसिपको व्यवस्था गर्नूको साथै सञ्चार सामग्रीको बिमा गर्ने प्रबन्धका लागि पहल गरिनेछ । श्रमजीवी पत्रकार कल्याण कोषलाई थप प्रभावकारी बनाउने प्रण गर्दछौं ।
४) संघ, प्रदेश र स्थानीय तहमा सञ्चारमैत्री नीति, कानून र संरचना निर्माणका लागि ठोस पहल गर्नेछौ ।
५) पत्रकार आफैले चलाएका स्वरोजगारमूलक सञ्चार माध्यमको संरक्षण, समानुपातिक विज्ञापन वितरणको व्यवस्था र स्थानीय विज्ञापन स्थानीय सञ्चार माध्यमलाई दिलाउन ठोस पहल गर्ने छौं । साथै, सरकारले प्रदान गर्दै आएको लोककल्याणकारी विज्ञापन शतप्रतिशत वृद्धिको लागि पहल गर्नेछ ।
६) पत्रकारिता क्षेत्रमा लामो समय योगदान दिनुभएका पत्रकारहरुका लागि वरिष्ठ पत्रकार सम्मान तथा जीवनवृत्ति र अपांगता भएका पत्रकारका लागि मासिक भत्ताको व्यवस्था, महिलाले चलाएका र मातृभाषाका सञ्चार माध्यमका लागि विशेष व्यवस्था गर्न पहल गर्ने छौं ।
७) महिला, दलित, आदिवासी, जनजाती, अपांगता, मधेशी, सीमान्तकृत र पछाडि परेका क्षेत्र, वर्ग र समुदायको आमसञ्चारमा प्रतिनिधित्व बढाउन थप पहल गर्नेछौं ।
८) पत्रकार महासंघको सदस्यता लिएका सम्पूर्ण पत्रकारको निःशुल्क दुर्घटना तथा स्वास्थ्य बिमाको प्रक्रियालाई अघि बढाउने छौं ।
९) महासंघका संघ, प्रदेश र शाखा कार्यालय भवनलाई पूर्णता दिँदै इ–लाईब्रेरी र सञ्चार संग्रहालय निर्माण गर्नेछौं । लामो समयदेखि पत्रकारितामा क्रियाशील अग्रजको ज्ञान, अनुभव र योगदानलाई ज्ञान स्रोतका रूपमा दस्तावेजीकरण गर्नेछ ।
