काठमाडौं, १२ पुष । नेकपा (एमाले) का प्रभावशाली नेता तथा सांसद सूर्य थापाले भाटभटेनीका मालिक मीनबहादुर गुरूङ नेपालको आइकन मान्छे भएको भन्दै प्रशंसा गरेका छन् । आज (शुक्रबार) विहान नेपाली रेडियो नेटवर्कबाट प्रसारण भएको नेपाली बहस कार्यक्रममा पत्रकार ऋषि धमलासँगको कुराकानीमा उनले मीनबहादुर राष्ट्रिय सफल उद्यमी भएको चित्रण गरे ।
उनले भने,‘मीनबहादुर गुरूङको तपाईंहरु सकेजति निन्दा गर्नुहोस, किनभने राष्ट्रिय उद्यमी, राष्ट्रिय पुँजीपति र राष्ट्रिय व्यवसायीलाई आफ्नो श्रम र पौरखले भाटभटेनीजस्ता वार्षिक ४० अर्बको कारोबार गर्ने र झण्डै एक अर्ब राजश्व तिर्ने अनि ३० वटाभन्दा बढि सुपरस्टोर सञ्चालन गरिरहेको, सुपरस्टोर सञ्चालनको हिसाबले उहाँ सुरुवातकर्ता र आईकन मान्छे हो । मीनबहादुर खराब भनेर तपाईंहरुले त्यही भनिराख्नुहोस । तर, म तपाईंहरुले भनेको कुरा मान्दिनँ ।’ मीनबहादुरले एमालेलाई दिएको जग्गाको विषयमा कुनै अदालतमा विवादपनि नभएको थापाको स्पष्टोक्ति छ ।
