काठमाडौँ, ३ भाद्र । राष्ट्रिय क्रिकेट खेलाडी सोमपाल कामी सम्मानित भएका छन् ।
एकिकृत नेपाल राष्ट्रिय विश्वकर्मा समाजले नेपालको क्रिकेट क्षेत्रलाई माथि उकास्न विशेष योगदान पुर्याएको भन्दै क्रिकेटर कामीलाई सम्मान गरेको हो ।
समाजले शनिबार राजधानीमा आयोजना गरेको१४ औँ वार्षिक साधारण सभा तथा तीज विशेष कार्यक्रममा वाणिज्यमन्त्री मीनबहादुर विश्वकर्माले कामीलाई सम्मान गर्दै आगामी दिनमा नेपालको क्रिकेट क्षेत्रलाई अन्तर्राष्ट्रिय रुपमा अझ सशक्त उपस्थिति गराउँन डटेर लागि पर्ने विश्वास व्यक्त गरे ।
मन्त्री विश्वकर्माले छोटो समयमै नेपाली क्रिकेटले ठूलो फड्को मारेको भन्दै सरकारले क्रिकेट खेलको विकास र विस्तारमा विशेष जोड दिने बताए ।
उनले क्रिकेट क्षेत्रको पूर्वाधार विकासमा सरकारले कुनै पनि कसर बाँकी नराख्ने धारणा व्यक्त गर्दै मुलपानी लगायतका क्रिकेट मैदान निर्माण सरकारको प्राथमिकताको रहेको बताए ।
मन्त्री विश्वकर्माले सरकार संघ र प्रदेशको चुनाव गराएर मुलुकलाई आर्थिक समृद्धिको बाटो तर्फ अघि बढाउन लागिरहेको बताए ।
उनले सरकारले संविधानको सफल कार्यान्वयन मार्फत दलित ,जनजाती , मधेशी , मुस्लिम थारू लगायतका उत्थान र हक अधिकार स्थापित गर्न लागिपरेको बताए ।
विश्वकर्माले सरकारको मिसन चुनाव , सुशासन, समृद्धि र संविधान सफल कार्यान्वयन रहेको बताए ।उनले विश्वकर्मा समुदायले बनाउने खुकुरी, सुनका गरगहना लगायतका कलात्मक वस्तुहरुको व्यापारलाई अन्तर्राष्ट्रिय व्यापारको रुपमा विस्तार गर्न पहल गर्ने बताए ।
विश्वकर्माले तीज लगायतका चाडपर्वले संस्कृति संरक्षण र राष्ट्रिय एकता मजबुत बनाउएको धारणा राखे । कार्यक्रममा विश्वकर्मा समुदायबाट राज्यको विभिन्न क्षेत्रमा प्रतिनिधित्व गर्न सफल भएका व्यक्तिहरुलाई सम्मान गरिएको थियो ।
