इलाम, ९ मंसिर (रासस) ः पूर्वप्रधानमन्त्री झलनाथ खनालले संविधानले सबै नागरिकलाई समान अधिकार दिएको बताउनुभएको छ ।
सन्दकपुर गाउँपालिकास्थित माईमझुवामा वाम गठबन्धनले आयोजना गरेको चुनावीसभामा उहाँले भन्नुभयो, “अहिलेको संविधानले सबै अधिकार नदिए पनि सबै नागरिकलाई समानरूपमा अधिकार दिएको छ ।” संविधान आफैँमा पूर्ण नहुने र संशोधनमार्फत पूर्ण गर्दै लगिनेसमेत बताउनुभयो ।
क्षेत्र नं १ का प्रतिनिधिसभाका उम्मेदवारसमेत रहनुभएका पूर्वप्रम खनालले अबको आवश्यकता वाम गठबन्धन नै रहेको र यसपटकको निर्वाचनमा वाम गठबन्धनले दुई तिहाइ मत ल्याएर सरकार निर्माण गर्ने दाबीसमेत गर्नुभयो ।
इलाम नगरपालिकाको विकास गर्न नेम्वाङ प्रतिबद्ध
यसैबीच, इलाम क्षेत्र नं २ का प्रतिनिधिसभाका उम्मेदवार तथा पूर्वसभामुख सुवास नेम्वाङले आज इलाम सदरमुकामस्थित पिपलबोटेमा आयोजित चुनावी कार्यक्रमलाई सम्बोधन गर्दै निर्वाचनपछि देशमा विकास र समृद्धिले गति लिने बताउनुभयो ।
उहाँले एमालेको अगुवाइमा संविधान बनेकाले त्यसलाई जस्ताको तस्तै कार्यान्वयन गर्नका लागि वाम गठबन्धन गरिएको उल्लेख गर्नुभयो ।
वाम गठबन्धनका इलाम नगरपालिका वडा नं ६ का संयोजक बेसु लिङदमको अध्यक्षतामा भएको कार्यक्रममा समानुपातिक उम्मेदवार तारा गुरूङले पनि बोल्नुभएको थियो ।
कार्यक्रमपछि नेम्वाङले इलामको पर्यटकीयस्थल भालुढुंगाको समेत स्थलगत निरीक्षण गर्नुभयो । नगरपालिकाभित्र रहेका पर्यटकीयस्थलको पर्यटन प्रवद्र्धन गर्न युवा जागरूक भएको भन्दै नेम्वाङले प्रशंसासमेत गर्नुभयो ।
