११ पुस, काठमाण्डौ । नेपाली कांग्रेसका नेता रमेश लेखकले प्रधानमन्त्री शेरबहादुर देउवा सरकारमा टासिँएर बसेको भन्ने आरोपको खण्डन गरेका छन् । नेपाली रेडियो नेटवर्कको कार्यक्रम नेपाली बहसमा ऋषि धमलासँग कुरा गर्दै नेता लेखकले जनताको जनमत आए अनुसार वैधानिक रुपमा सरकार हस्तान्तरण गर्न चाहे पनि वाधा अवरोध आएको बताए ।
ठीक समयमा कानुनअनुसार सत्ता हस्तान्तरण गर्न कांग्रेस तयार भएको उनले स्पष्ट पारे । राष्ट्रियसभाको चुनाव नहुँदै सरकार छोडेमा जटिलता उत्पन्न हुने भएकाले तत्काले सरकार छाड्दैमा समस्या समाधान हुने नभै थप राजनीतिक जटिलता आउने लेखकले बताए ।
नयाँ सरकार गठनका लागि राष्ट्रियसभाको चुनाव अनिवार्य भएकाले देउवा नेतृत्वको सरकारले राष्ट्रियसभाको गठन गरेर मात्रै सत्ता हस्तान्तरण गर्नुपर्ने संवैधानिक व्यवस्थासमेत भएको उनको दाबी छ ।
संविधानबमोजिमको सरकार प्रतिनिधीसभाले बनाउने भएकाले त्यसका लागि राष्ट्रियसभाको पनि गठन हुनुपर्ने लेखकले बताए ।
“प्रतिनिधीसभाको गठन नभै सडकबाट सरकार बन्छ ? टुडिखेलबाट बन्छ ?” लेखकले प्रश्न गरे ।
