दाङ, १४ पुस (रासस) : श्रमराज्य मन्त्री डिल्लीबहादुर चौधरीले यहाँको एक विद्यालयमा रु पाँच लाखको अक्षयकोष स्थापना गर्नुभएको छ ।
बुबा टुकलाल चौधरीको स्मृतिमा दाङको तुलसीपुरस्थित महेन्द्र माविमा उहाँले उक्त रकमको अक्षयकोष स्थापना गर्नुभएको हो । ती रकममध्ये रु दुई लाखको जेहेन्दार विद्यार्थीलाई छात्रवृत्ति र रु तीन लाख विद्यालयको शैक्षिक सामग्री खरिदका लागि खर्च गर्ने गरी अक्षयकोष स्थापना गरेको विद्यालयका प्रधानाध्यापक विष्णु थापाले जानकारी दिनुभएको छ ।
आफूले अध्ययन गरेको विद्यालयको ५६ आँै वार्षिकोत्सव समारोहमा आज उहाँले सो अक्षयकोष स्थापना गर्नुभएको हो । सो अवसरमा राज्यमन्त्री चौधरीले अबको शिक्षा रोजगारमुखी हुनुपर्नेमा जोड दिदैं अबको शिक्षा बेरोजगार उत्पादन गर्नेभन्दा पनि प्राविधिक र रोजगारीमूलक हुनुपर्ने बताउनुभयो ।
