वैशाख ४, काठमाण्डौ । सरकारले नेपाली श्रम बजारमा प्रतिदिन ६ सय ५८ नयाँ रोजगारी सिर्जना गर्नुपर्ने विश्व बैंकको एक प्रतिवेदनले औंल्याएको छ ।
विश्व बैंकले नेपालको श्रम बजारमा प्रतिमहिना ३५ हजार जनशक्ति थपिने गरेको भन्दै सरकारले रोजगारी दिनको लागि वार्षिक २ लाख ४० हजार नयाँ रोजगारी सिर्जना हुनुपर्ने जनाएको खबर आजको कारोबार दैनिकले छापेको छ ।
बैंकको प्रतिवेदनअनुसार नेपाल सरकारले प्रतिदिन ६ सय ५८ नयाँ रोजगारी सिर्जना गर्नुपर्ने चुनौती देखिन्छ ।
विश्व बैंकले सोमबार प्रकाशन गरेको रोजगारीविनाको वृद्धि प्रतिवेदनअनुसार विश्वका विकसित मुलुकले झैं उच्च रोजगारी सिर्जना गर्न आर्थिक वृद्धिले मात्र पुग्दैन ।
सन् २०२५ सम्ममा मासिक रुपमा दक्षिण एशियाका १८ लाख युवा काम गर्ने उमेरमा परिपक्व हुँदै जाने र यस क्षेत्रमा आर्थिक वृद्धिदरको कारण रोजगारी सिर्जनादर राम्रो भएको टिप्पणी पनि विश्वबैंकले गरेको छ ।
तर काम गर्ने उमेर समूहका युवाको जनसंख्या अत्यधिक रुपमा बढिरहेको परिप्रेक्षमा आर्थिक वृद्धिले मात्र रोजगारी सिर्जना गर्न मद्दत गर्न नसक्ने पनि प्रतिवेदनमा उल्लेख छ ।
