काठमाडौं, ५ बैशाख । चीन भ्रमणमा रहेका परराष्ट्रमन्त्री प्रदीप ज्ञवाली र चिनियाँ विदेशमन्त्री वाङ यीबीच आज भेटवार्ता सम्पन्न भएको छ।
चीनको राजधानी बेइजिङमा भएको वार्तापछि दुवैले संयुक्त सम्बोधन समेत गरेका थिए । चिनियाँ विदेशमन्त्री वाङ यीले नेपाल र चीनबीच हिमालयपार ‘कनेक्टिभिटी’ विस्तार गर्ने समझदारी भएको बताए।
उनले यस्तो कनेक्टिभिटी भारतसम्म पुग्नुपर्ने धारणा राखे। नेपाल र चीनबीच निर्माण हुने रेललाई इङ्गित गर्दै विदेशमन्त्री यीले यस्तो कनेक्टिभिटीबाट निर्माण हुने आर्थिक कोरिडरले तीन वटै देशको विकासमा मद्दत पुग्ने उल्लेख गरे।
सम्बोधनको क्रममा उनले भने,‘नेपालको विकासका लागि चीन र भारतको साझा धारणा बन्नुपर्छ, हामी छिट्टै ‘बेल्ट एण्ड रोड इनिसिएटिभ’ अन्तर्गत निर्माण हुने आयोजनाहरुको सूची सार्वजनिक गर्नेछौँ।’
उनले नेपालको उर्जा आवश्यकतालाई पूर्ती गर्न स्रोतहरुको विविधीकरणमा चीनले सहयोग गर्ने वचन दिए।
त्यस्तै नेपालका परराष्ट्रमन्त्री ज्ञवालीले नेपालबाट आधुनिक रेलमा चीन भ्रमण गर्ने आफ्नो सपना रहेको धारणा राखेका थिए । उनले नेपाल र चीनबीच रेल्वे निर्माणको छिट्टै सम्भाव्यता अध्ययन गर्नुपर्ने धारणा राखे।
तस्विर : परराष्ट्र मन्त्रालयको ट्विटरबाट
