होटल म्यानेजमेन्ट अध्यापन सम्झौता

शान्ति र विकासका लागि युवा नेपालको सहयोगमा उक्त कलेजले गरिब र विपन्न समुदायका विद्यार्थीलाई सहुलियत दरमा एकवर्षे डिप्लोमा इन होटल म्यानेजमेन्ट पढाउने सम्झौता गरेको हो ।

आर्थिक अवस्था कमजोर भएका विद्यार्थीलाई पढ्ने अवसर दिलाउन सो सम्झौता गरिएको शान्ति र विकासका लागि युवा नेपालका उपाध्यक्ष श्रवण घिमिरेले जानकारी दिनुभयो । पैसा नभएर पढ्न नपाउने केही विद्यार्थीलाई सहयोगका लागि इम्पेरियलसंँग सम्झौता गरिएको उहाँको भनाइ थियो ।

भारतको दार्जिलिङमा होटल म्यानेजमेन्ट अध्यापन गराउँदै आएको इम्पेरियलले यस वर्षदेखि इटहरीमा पनि सेवा विस्तार गरेको र पढाइ सकेपछि शतप्रतिशत विद्यार्थीलाई रोजगारी दिने इम्पेरियलका सञ्चालक बद्री अर्यालले जानकारी दिनुभयो ।

उहाँले रु दुई लाख ५० हजारको कोर्ष रू एक लाख २० हजारमा पढाएर आर्थिक अवस्था कम भएका विद्यार्थीलाई सहयोग गर्न लागेको थप जानकारी दिनुभयो ।

दार्जिलिङमा डिप्लोमा इन होटल म्यानेजमेन्ट र ब्याचलर इन होटल म्यानेजमेन्टका कोर्ष पढाउँदै आएको इम्पेरियलले इटहरीमा भने यसै आर्थिक वर्षदेखि ‘कुलिनरी आर्टस एण्ड हस्पिटालिटी’ मेनेजमेन्टका नाममा डिप्लोमा इन होटल म्यानेजमेन्टको कक्षा शुरु गरेको जनाएको छ ।  (रासस)