काठमाडौं, १० असार । विश्वकप फुटबलमा बेल्जियम र मेक्सिकोले लगातार दोस्रो जित हात पार्दा जर्मनीले पनि पहिलो खेल जितेको छ ।
गएराति सोचीस्थित ओलम्पिक रंगशालामा भएको खेलमा स्विडेनलाई हराउँदै जर्मनीले रुसमा जारी विश्वकप फुटबलमा पहिलो जित हात पारेको हो ।
खेलको ३२ औं मिनेटमा ओला तोईभोनेनले गोल गर्दै स्विडेनलाई सुरुवाती अग्रता दिए । ४८ औं मिनेटमा मार्को रिउसले एक गोल थप्दै जर्मनीलाई बराबरीसम्म ल्याए ।
बराबरीको संघारमा पुगेको खेलको ईन्जुरी समयमा जर्मनीले एक गोल थप्यो । जर्मनीका लागि रिउसको पासमा टोनी क्रुसले विजयी गोल गरेका हुन् ।
जितसँगै जर्मनीले प्रतियोगिताको दोस्रो चरणमा पुग्ने सम्भावना जिवित राखेको छ । पहिलो खेलमा मेक्सिकोसँग हारेको जर्मनीले समूहको अन्तिम खेलमा दक्षिण कोरियाको सामना गर्नेछ । एजेन्सीको सहयोगमा
