असार १२, काठमाण्डौ । विश्वकप फुटबलमा समुह बीबाट स्पेन र पोर्चुगल अन्तिम १६ मा पुगेका छन् ।
गएराती सम्पन्न खेलमा समुह बीका दुर्व खेल बराबरीमा सकिएको थियो । पोर्चुगलले इरानसँग एकएक गोलको बराबरी खेल्दै पाँच अंकसहित समुह उपविजेता बनेर अघिल्लो चरणमा प्रवेश गरेको हो ।
त्यस्तै स्पेनले मोरक्कोसँग २–२ गोलको बराबरी खेल्यो । स्पेनले पनि पाँच अंक बटुल्यो, तर गोल अन्तरका आधारमा अंक तालिकाको शीर्ष स्थानाम रहँदै समुह विजेतको रुपमा अघिल्लो चरणमा प्रवेश गर्यो ।
क्रिष्टियानो रोनाल्डो पेनाल्टीमा चुकेको खेलमा पोर्चुगलले इरानसँग बराबरी खेलेको छ र विश्वकपको अन्तिम १६ मा स्थान बनाएको छ ।
भीएआर विवादले भरिएको खेल पोर्चुगलले इरानसँग १–१ को बराबरी खेलेको हो ।
खेलको इन्जुरी टाइममा इरानले पाएको पेनाल्टी होस् वा ८३ औं मिनेटमा रोनाल्डोको सम्भावित रातो कार्डलाई पहेंलोमा सीमित राख्ने रेफ्रीको निर्णय होस्, दुबै भीएआरबाट लिइएको थियो ।
खेलमा पोर्चुगलले पहिलो हाफको अन्तिम मिनेटमा रिकार्डो करिस्माको गोलबाट अग्रता लिएको थियो । दोस्रो हाफको सुरुमा नै पोर्चुगलले पेनाल्टी पायो ।
भीएआर रिभ्यूबाट पाएको पेनाल्टीमा रोनाल्डो गोल गर्न चुके । उनको प्रहारलाई इरानी गोलकिपर अली बेरानभान्डले रोके ।
खेलको ८१ औं मिनेटमा फेरि भीएआर रिभ्यू भयो । इरानी खेलाडीको अनुहारमा हात पुर्याएपछि रोनाल्डोले रातो कार्ड पाउने सम्भावना थियो । तर, लामो भीएआर रिभ्यूबाट पहेँलो मात्र दिइयो ।
दोस्रो हाफको अन्तिम मिनेटमा फेरि भीएआर रिभ्यूबाटै इरानलाई पेनाल्टी दिइयो । सेडरिक सोयरेसको ह्याण्डबलमा पेनाल्टी दिइएको थियो, जसमा करिम अन्सरीफार्दले गोल गरे ।
त्यही समयमा भएको अर्को खेलमा स्पेनले मोरक्कोसँग बराबरी खेलेको छ र स्पेन समूह बीको विजेता बन्न सफल भएको छ ।
अब नकआउट चरणमा पोर्चुगलले उरुग्वेसँग र स्पेनले आयोजक रसियासँग खेल्नु पर्नेछ ।
