काठमाडौं, १७ कात्तिक । नेइमार र किलियन एमबाप्पे चम्कँदा फ्रान्सेली क्लब पेरिस सेन्ट जर्मेन (पीएसजी) ले लिगको १२ खेलसम्म लगातार जित निकालेको छ।
शुक्रबार भएको लिग वान अन्तर्गतको खेलमा लिललाई २-१ ले हराउँदै लगातार १२ औं जित निकालेको हो। पीएसजीलाई जिताउन नेइमार र किलियन एमबाप्पेले समान एक-एक गोल गरे।
खेलको अन्तिम समय तिर लिलले सान्त्वना गोल फर्कायो। पहिलो हाफ गोलरहित भए पनि दोस्रो हाफमा पिएसजीले गोल गरेको हो। खेलको ७० औं मिनेटमा गोल गर्दै एम्बाप्पेले पिएसजीलाई अग्रता दिलाए। खेलको ८४ औं मिनेटमा नेयमारले एमबाप्पेको पासमा गोल गर्दै अग्रता दोब्बर पारे।
निकोलस पेपेले खेलको अन्तिम मिनेटमा पेनाल्टी मार्फत लिलका लागि गोल गर्दै खेलमा फर्काउने प्रयास गरे पनि त्यो पर्याप्त रहेन।
यो जितसँगै पीएसजीले १२ खेलबाट सतप्रतिशत ३६ अंक बनाएको छ। दोस्रो स्थानमा रहेको लिलको २५ अंक छ।
योसँगै युरोपियन क्लब फुटबलमा पिएसजीले ५८ वर्ष पुरानो कीर्तिमान तोडेको छ। पिएसजीले इंग्लिश क्लब टोटेनहमले बनाएको ११ खेलमा लगातार जितको कीर्तिमान उछिनेको हो। टोटेनह्यामले सन् १९६०/६१ को सिजन लगातार ११ खेलमा जित निकाल्दै उक्त कीर्तिमान बनाएको थियो। एजेन्सीको सहयोगमा
