मंसिर ९, काठमाण्डौ । नेपाली कांग्रेसका केन्द्रिय सदस्य गुरराज घिमिरले आज बस्ने केन्द्रिय समिति बैठकमा सहमति जुटाउनुको विकल्प नभएको बताएका छन् ।
नेपाली रेडियो नेटवर्कको कार्यक्रम नेपाली बहसमा ऋषि धमलासँग कुरा गर्दै घिमिरले महासमिति बैठकमा लैजाने प्रस्तावलाई केन्द्रिय समितिले परिपक्व बनाउनुपर्ने भएकाले नेताहरुबीच एकमत हुनै पर्ने बताए ।
आफूहरुले पार्टीलाई एकढिक्का बनाउन लागि पहल गरिरहेको जिकिर गर्दै उनले अहिले पार्टीभित्रको अन्तरद्धन्द्ध बढाउने समय नभएको बताए ।
पार्टीलाई एकढिक्का बनाउने दायित्व सभापति शेरबहादुर देउवाको भएको भन्दै उनले वरिष्ठ नेता रामचन्द्र पौडेल र अन्य पदाधिकारीले पनि सहजिकरण गर्नुपर्नेमा जोड दिए ।
तर नेताहरुबीच एकमत हुने सम्भावना न्यून देखिएको घिमिरेले बताए । मैले सुनेअनुसार फरक मत आउँदैछ । “पदाधिकारी थप्ने कि नथप्ने ? केन्द्रिय समितिका पदाधिकारी निर्वाचित गर्ने वा मनोनित गर्ने भन्ने जस्ता विषयमा फरक मत आउँदैछ भन्ने सुनेका छौँ ।” उनले भने ।
